Plasserer Øystese på vinkartet
Glime restaurant i Hardangerfjord Hotel i Øystese er med i to finalar i tevlinga Norges beste vinkart.
Christer Økland er kokk og vinkelner, og har det overordna ansvaret for kvaliteten på mat og drikke hjå dei tre Fjordtind-hotella.
Han kan konstatera at øystesehotellet er nominert saman med fem andre i kategorien Norges beste lille vinkart, og saman med fire andre i kategorien Norges beste siderkart.
Norsk Vinkelnerforening, Star Wine List og Kapital skipar til konkurransen. Finalen finn stad under Sommelierens dag på Hotel Bristol i Oslo sundag 24. september.
– Det er stor stas. Det er så vidt eg torer å skryta, som innflytta harding. Men me synest det er alvorleg tøft. Me er meir enn nøgde berre med å verta nominerte, seier han.
Økland ser føre seg at hotelldirektøren, restaurantsjefen og han reiser til kåringa i Oslo for å sjå seg om og vera litt med i det gode selskap.
Alt restauranten måtte gjera for å delta i konkurransen var å senda inn ein kopi av sider- og vinkartet. Økland går ut ifrå at arrangørane har ein viss kvalitetskontroll med besøk. Men det får ein ikkje vita.
Glime restaurant har 118 typar vin og 72 typar sider.
– Kva er det som gjer ein vin god?
– Det kjem heilt an på den som drikk. Ein god vin er god, utan feil. Så kjem det an på kva du drikk han til, og kvar du er.
– Kor viktig er det å lukta på vinen?
– Det er heilt uvurderleg. Viss du ikkje har luktesans eller ikkje luktar på vinen, så kan du ikkje bedømma om han er god eller dårleg. Det har samanheng med smakssenteret ditt. Så ein må lukta på vinen. Det er klart.
– Kva kan fargen fortelja?
– Om han er raud eller kvit, alderen, råstoff, druetype og type vin. Fargen kan plassera vinen i eit land. Så fargen seier mykje, også om produksjonsmetode, ikkje minst.
Sjølv er den utdanna vinkelneren svak for kvite burgunderar og brunello. Påtroppande restaurantsjef Ingvild Rykkje frå Øystese reiser på vinkelnerkurs i september.
– Det er me litt stolte av, seier Økland.
Dei andre hotella i Fjordtind Hotels er Brakanes Hotel i Ulvik og Vøringfoss Hotel i Eidfjord. Hardangerfjord Hotel har òg eit samarbeid med Hardanger House i Jondal.
