Planlegg oppgradering av vasskraftverk
Statkraft AS har søkt om konsesjon for ei stor modernisering av Folgefonnreguleringa i Kvinnherad og Ullensvang.
Det går fram av eit presseskriv frå selskapet.
Verksemda har søkt Noregs vassdrags- og energidirektorat (NVE) om å få auka den installerte effekten frå 250 megawatt til 880 megawatt. Prosjektet vil gje 70–80 gigawattimar ny energi inn i kraftsystemet, tilsvarande straumforbruket til 5.000 hushald.
Det er 40 år sidan sist Statkraft søkte om konsesjon for eit så stort vasskraftprosjekt. Moderniseringa vil gjera Mauranger II til det femte største kraftverket i Noreg, målt i effekt.
– Det vil verta eit auka behov for meir fleksibilitet og effekt. Me kan bidra til dette gjennom å oppgradera vasskraftverk. Auka behov for kraft og eit betre skattesystem gjer at det no er mogleg å få til store prosjekt. Behovet for auka fleksibilitet kan gje ein renessanse for eksisterande norske vasskraftverk, seier konsernsjef i Statkraft, Christian Rynning-Tønnesen.
Saman med moderniseringa av Mauranger kraftverk, som vil auka effektkapasiteten i kraftsystemet på Vestlandet, vil utbygging av nett vera ein del av løysinga på behovet, påpeikar Statkraft. Prosjektet legg dessutan til rette for havvind og ny industribygging. Byggjestart kan verta i 2026.
