Planlegg nytt bustadprosjekt

– Me ser at området er attraktivt, med solrik lokasjon og nærleik til sentrum.

Det seier Arne Lunestad, dagleg leiar i Fuglafjell AS, som står bak prosjektet. Leilegheitene er planlagt bygde på nedsida av fylkesvegen mellom Tolo og Norheimsund.

Nyleg handel

Hardangerfjordvegen 48 AS, eigt av Fuglafjell, kjøpte tomta av Mo Sport Eiendom AS for fire millionar kroner like før jul.

Fuglafjell er tufta på eit samarbeid mellom verksemdene H2 Hardanger AS, Tecno VVS AS og Byggeriet Johs E Øvsthus, og stod også bak leilegheitsprosjekta Soltorp og Solstrand. Dei tre prosjekta ligg innanfor same område og reguleringsplan.

Leilegheitsprosjektet er det einaste lokale byggjeprosjektet Fuglafjell har planar om i 2025. Utanfor kommunegrensa skal fleire kommunale prosjekt ferdigstillast, mellom anna i Kvinnherad og på Voss.

Det er teikna inn fem einingar med eit bruksareal på mellom 117 og 140 kvadratmeter, fordelte på tre plan. Om alt går etter planen, vert det byggjestart allereie til våren, med overtaking på seinsommaren i 2026.

– Me er optimistiske, seier Lunestad.

– Samstundes vil det ofte ta noko tid med sal av husvære i denne prisklassen.

Leilegheitene kostar nemleg om lag ti millionar kroner.

– Spanande

Planane er spanande, synest Kjetil Solheim Aarsand. Han er fagansvarleg og eigedomsmeklar i Nordvik Hardanger.

Ifylgje han er det framleis ei jamn interesse for leilegheiter i Kvam, og prosjektet har fasilitetar mange ser etter. Særleg moderne og praktiske bustader som passar for ulike målgrupper, er interessante for folk.

Kjøparar i området legg vekt på kvalitet, god plassering og funksjonelle løysingar som gjer kvardagen enklare, skriv Aarsand til HF.