Planlegg ny kabel over fjorden

Fleire store kraftforbrukarar held allereie til i området kring Tørvikbygd, som er forsynt gjennom ei 22-kilovoltline i det lokale nettet til Kvam Energi AS. Selskapet har fått fleire nye førespurnader om tilkopling til nettet i området.

Konklusjonen er at kapasiteten bør utvidast for å takla maksimal last i nettet best mogeleg. Spørsmålet er berre korleis.

Billegast og snøggast

Fleire løysingar er vurderte. Det beste alternativet ser ut til å vera å leggja ein ny sjøkabel mellom Jondal og Tørvikbygd for å knyta saman nettet til Kvam Energi og Energiselskapet Hardanger AS. Kostnaden med kabelen, som kan verta om lag seks kilometer lang, er grovt stipulert til vel 24 millionar kroner. I teorien kan han vera i drift i løpet av 2023.

Alternativet, ei line på 132 kilovolt til Skulafossen kraftstasjon, vil både ta mykje meir tid, føra til større naturinngrep i form av kraftgate i skogen og transformatorstasjon, og kan kosta 80—100 millionar kroner.

Opplysningane kom frå administrerande direktør Arne Tillung i Kvam Energi då han og styreleiar Gunnar Skeie møtte formannskapet til eit såkalla eigarmøte 24. november. Tillung understreka at det er styret som må ta avgjerda om å investera i sjøkabelen.

Denne veka opplyste han at styret enno ikkje har teke avgjerd i saka.

Må i land

Prosjektet er drøfta med Energiselskapet Hardanger, og både sjøbotnen og ulike stader å føra kabelen i land er vurderte. Dei mest trulege alternativa på kvammasida er på Ljones og på strekkja Eidesvågen—Augestad. Det fyrste har skilt seg ut så langt.

Tillung understreka at kabelen ikkje berre vil gje kapasitet til mykje nytt forbruk, men også betra forsyningstryggleiken gjennom eit nytt innmatingspunkt i det lokale nettet. Det same vil gjelda i nettet på jondalssida.

— Me må gjera det som er naudsynt. Det kan ikkje vera slik at ei bedrift ikkje kan utvida fordi ein ikkje kan skaffa straum, sa Gunnar Skeie.

Fleire folkevalde støtta planane om kabel over fjorden gjennom eit samarbeid som gagnar fleire partar, pluss næringslivet.

Tillung understreka at sidan det tek tid å utvikla nettet, er det viktig å vera tidleg ute og føre var — eller, som Ottar Randa (H) igjen uttrykte det, å sjå rundt neste sving.

Manar til varsemd

Skeie påpeika at både denne kabelen og føreståande rehabilitering av dammane ved Krokavatnet vil føra til store investeringar i ei verksemd som frå før har ei gjeld på 177 millionar kroner og eit «relativt høgt utbytenivå».

— Om me tek ut ein stor del av overskotet og ikkje får ned gjelda, kjem me dit at det må inn meir eigenkapital i selskapet for å få lån. Eg oppmodar til ein viss moderasjon for at selskapet skal vera berekraftig. Om ein ikkje tenkjer langsiktig, vil selskapet koma i vanskar, sa Skeie.

— Det skal eg leggja meg på minnet, sa Frode Nygård (Frp), som lura på om energiselskapet arbeider systematisk med kostnadsreduserande tiltak.

Skeie stadfesta at ein har drøfta om ein skal redusera bemanninga, men viste til beredskapskrav. Styreleiaren forsikra om at han har tillit til administrasjonen si vurdering av bemanningsbehovet.

— Styret skal sjå til at det er forsvarleg eigenkapital. Om me som eig, stadig skal tømma kassen, vil ein få utfordringar med å finansiera tiltaka, sa Randa.

Tillung opplyste i eigarmøtet at det i januar i fjor, då det var svært kaldt, vart sett ny rekord i maksimalt forbruk med rundt 40 megawatt. Den gamle rekorden var på kring 37. Kraftleverandøren reknar med ein auke i forbruket på kring to prosent, mellom anna på grunn av lading av elbilar.