Planlegg ny bru over Jondalselva
Den gamle hengjebrua over Jondalselvi vart fjerna då nye Haugafossen kraftverk vart reist. No er ei ny på beddinga.
Hardanger Energi AS har søkt kommunen om løyve til å setja opp ei ny bru over elva nedanfor Vikeholmane, mellom Jondal sentrum og Byrkjelandsvatnet. Søknaden omfattar også ei trapp frå brua til vegskuldra ved Fonnavegen.
Ny rundtur?
Ifylgje søknaden i februar vart den gamle brua nytta i samband med jakt og vøle og vedlikehald av høgspentlina. I tillegg fanst ein tursti på nordsida av elva, frå Fjøringen til Jondalsholmane, men denne har vore lite nytta i seinare tid som fylgje av utrasing som har gjort det farleg å ferdast somme stader. I gamle dagar var stien tilkome til slåtteteigar ved Vikeholmane.
– Ved bygging av bru og tilrettelegging og oppgradering av turstien kan dette verta ein fin rundtur der dagsturhytta på Teglhaug kan innlemmast, skriv energiselskapet.
Brua skal vera 17–18 meter lang og 1 meter brei, og skal liggja kring 70 meter nedanfor demningen. Brufundamentet i betong vert størst – 2–3 meter høgt – på sørsida mot vegen. Dette kan heisast på plass med kranbil.
Hardanger Energi skal gjennomføra byggjeprosjektet, medan jeger- og fiskarlaget i Jondal skal stå for drift og vedlikehald. Ny Sti AS er ansvarleg søkjar.
Om det kjem mykje nedbør, vil brua verta stengd, opplyser søkjaren.
Fleire formalitetar
Ettersom nordsida av brua ligg i Gulbergnotten landskapsvernområde, har Hardanger Energi søkt Statsforvaltaren om dispensasjon frå verneforskrifta til å byggja bru og fjerna noko vegetasjon. I april kom løyvet. Verneverdiane vert ikkje nemneverdig påverka, meiner Statsforvaltaren.
Vel tre månader etter at søknaden vart send, svara kommunen at han mangla ein del dokumentasjon. Mellom anna mangla avtale med grunneigar, altså kommunen, og dokumentasjon av skredfare, nabovarsel, målsette teikningar og søknader om ymse dispensasjonar. Hardanger Energi har fått frist til 30. august med å senda inn det som vantar.
Kommunen eig grunnen på båe sider av elva, og skal ifylgje ein e-post i februar ha akseptert tiltak på eigedomen. I februar lova kommunen å senda ein avtale om bruk av grunnen «så raskt den er avklart». Enno er ingen avtale å finna i arkivsaka.
