Planlegg aktivitetsanlegg

Det kan verta aktuelt fordi Vestland fylkeskommune har peika ut Haugamyr som eit såkalla pilotområde.

Ulike typar brukargrupper har vore med og gjeve innspel til prosjektet, frå ungdomar og foreldre til pensjonistar. I tillegg har prosjektet fått innspel frå elevrådet ved barneskulen og ressursgruppa til heradet.

– Eg synest prosjektet er veldig spanande og kjekt, seier rådgjevar for folkehelse, idrett og friluftsliv i Kvam herad, Reidun Braut Kjosås.

Sosial møtestad

– Eg håpar at det vert bra og at me kan utvikla eit område der mange føler at dei høyrer til og kan møta andre folk. Det er det som er ynsket vårt, seier Kjosås.

Oppdraget frå fylkeskommunen til konsulentfirmaet Asplan Viak AS, som no jobbar med planlegging av prosjektet, handlar mest om den eigenorganiserte aktiviteten.

I 2016 vart det utarbeidd ein moglegheitsstudie for Haugamyr, og ein del av elementa som vart lagde fram då, kan vera aktuelle i dette nye prosjektet òg.

– Det er eit idrettsområde, og me ynsker å sjå dei to planane saman, og så verta einige med dei ulike målgruppene om kva me skal velja å byggja, og korleis me skal skaffa finansiering. Det er det ikkje teke ei avgjerd om, og mange må få lov å meina noko om det, seier Kjosås.

Ein stad med tak

Asplan Viak leier planleggingsprosessen og skal teikna løysingsforslag. Kvam herad er pilotkommune. Lokale og Anlægsfonden frå Danmark hjelper fylkeskommunen med kompetanse på prosessar og nyskapande aktivitetsanlegg. Lokale og Anlægsfonden er med som rettleiar i prosjektet. Ein tenkjer annleis om anleggsutvikling i Danmark enn ein har gjort i Noreg, fortel Kjosås.

Det har kome fram at Norheimsund treng ein samlingsstad der det skjer noko spanande. Dei spurde meiner at Haugamyr bør vera ein stad med tak og ein stad ein kan møta vener. Anlegget bør ha eit samlande utgangspunkt for turar og opplevingar i kort avstand til kiosk, klubbhus, festlokale og parkering, kom det fram i intervjua som vart gjorde.

Pilotprosjektet for Haugamyr skal fyrst og fremst utforska moglegheitene for eit anlegg for alle som ikkje driv med organisert idrett.

Fylket betalar for plan

– Det nye prosjektet er òg knytt til skulane og ei eventuell utviding av utearealet til skulane. Difor er arealet også utvida frå Haugamyr og ned til barneskulen, og arealet er litt annleis enn i planen frå 2016, seier Kjosås.

Fylkeskommunen har engasjert Asplan Viak og tek kostnaden med konsulentselskapet. Det gjeld planleggingsfasen. Når prosjektet skal realiserast, må ein sjå på kva det vil kosta og korleis ein skal gjera det.

– Ingen friske pengar ligg i bordet per no, seier Kjosås.

– Viss ein vel å byggja nokre av anlegga som blir føreslegne i planen, som skal vera klar i februar, må me gjera dette i samarbeid med lag og organisasjonar og brukargruppene. Det må og gjerast ein jobb med å skaffa finansiering til anlegga. Kva anlegg som skal byggast og korleis det skal finansierast, er ikkje teke stilling til, seier rådgjevaren.

Anlegg for alle

Parken kan eigna seg for ulike målgrupper. Haugamyr kan verta eit anlegg for alle, på tvers av generasjonar.

– Håpar de at anlegget vert nytta av elevane ved den nye vidaregåande skulen?

– Absolutt, det kan vera mogleg. Anlegget vil liggja relativt nær den vidaregåande skulen. Det vil vera avhengig av kva som vert prioritert og bygd.

Brukargruppene som skal involverast, kan vera alt frå barnehagen til idrettslaga som er knytte til området.

– Me håpar at fleire grupper med ulike mål vil bruka området, seier Kjosås.

– Kan det vera at berre nokre av elementa vert bygde?

– Det veit me ikkje. Me må sjå på det i samarbeid med dei andre aktørane som er knytte til området. Kva skal me velja å gjera, og korleis skal me gjera det? Og korleis skal me skaffa pengar, ikkje minst? spør Kjosås.

Samfunnsutvikling

– Kven sin idé var dette?

– Då må du tilbake til når den nye barnehagen kom. Då vart moglegheitsstudien for aktivitetsparken laga, fordi det vart gjort endringar i området. I den fasen var også fylkeskommunen med, og syntest det var eit interessant område. Ein ville tenkja på prosjektet som heilskapleg lokalsamfunnsutvikling av Norheimsund. Då fylkeskommunen skulle gå i gang med dei fire pilotprosjekta som er no, vart me spurde om me kunne tenkja oss å vera ein pilotkommune. Det er inngangen vår til prosjektet. Det kan vera spanande.

Innspelsperioden var i utgangspunktet fram til 17. desember 2020, men er no utvida fram til og med fredag 15. januar. Kjosås håpar å få flest mogeleg innspel.