– Perlesnormanet observert i Jondal
Kurt Sollesnes har teke bilete av ei perlesnormanet i Jondal båthamn og rapportert funnet til Havforskingsinstituttet.
Forskar Tone Falkenhaug takkar for informasjonen, og skriv at det er noko forskarane set stor pris på å få. Ho nyttar høvet til å reklamera for ei nettside der ein kan senda inn observasjonar av funn, https://havfunn.dugnadforhavet.no.
Perlesnormanet (Apolemia uvaria) er ei kolonimanet med sterk neslegift. Dei siste åra har det vore ein auke i førekomsten langs norskekysten. Perlesnormaneta vert ikkje rekna som farleg for menneske, sjølv om det vil svi å verta brent av henne, men ho kan vera skadeleg for fisk. I 1997 døydde i alt 10–12 tonn laks på to anlegg ytst i Øygarden og Fedje på grunn av perlesnormanet, medan eit ukjent tal tonn vart naudslakta. I 2001 døydde 600 tonn fisk, av desse 400 tonn i Trøndelag, ifylgje havforskningsinstituttet.no.
