«Perla» for kreftsaka: – Fint å gjera små ting for å hjelpa

Fem åttandeklassingar på Kvam ungdomsskule som har valfaget innsats for andre, inviterte vener og sambygdingar til skulen i Øystese for å laga armband 2. november. Både pengane frå salet og dei ferdige armbanda gjekk til ei viktig sak.

– Det er fint å kunna gjera små ting for å hjelpa andre, seier Vilde Eide Skeie.

Ho er med i gruppa som stod bak arrangementet. Skeie fortel at gruppa hadde mykje å velja mellom då ho skulle bestemma seg for kva ho ville ha som prosjekt. Til slutt landa jentegjengen på å laga ei tilstelling med utgangspunkt i dei populære «Fuck cancer»-armbanda.

– Det er mange som brukar dei, og dei ser veldig fine ut. Difor tenkte me at det kunne vera ein god idé, forklarar Skeie.

– Og så viser det at det ikkje er vanskeleg å gjera noko for å hjelpa andre, legg Johanna Hjartnes til.

Formalitetar på plass

Før arrangementet måtte jentegruppa syrgja for at alt var på plass. I fyrste omgang måtte dei fylla ut søknadsskjema til Kreftforeningen for å få tak i naudsynt utstyr. Vidare laga dei plakatar og fordelte perler og band i posar og koppar.

Jentene fortel at den eigentlege planen var å laga armbanda samstundes som medelevane deltok på skulen sitt sponsorløp. Då var tanken at dei som av ulike årsaker ikkje kunne springa, skulle sitja i eit klasserom og «perla» armband. Men då det vart bestemt at alle skulle ta del i løpet, måtte dei leggja ein ny plan.

– Men det gjekk fint. Då kunne me jo invitera med andre òg, seier Skeie.

– Kjekt å perla

I eit av klasseromma sat det born og vaksne som laga armband. Seksåringen Jørgen Kvittingen hadde knapt tid til å snakka med lokalavisa. Han hadde nemleg som mål om å ha seks ferdige armband før kvelden var omme. Han var godt i gang med sitt tredje då han vart hefta av bladfyken.

– Det er kjekt å perla for å hjelpa andre, seier han.

Ved eit anna bord sat Simone Aga Rosseland saman med ei veninne. Dei to hadde teke turen innom skulen for moro skuld. Rosseland seier at det var mora som tipsa om tilstellinga. Sjuandeklassingen tykkjer det er veldig moro å perla og laga ting. Denne kvelden «perla» ho for den kreftråka bestefaren sin.

Faglærar Gaute Klyve og fagarbeidar Maria Fagerbakke Skeie såg til at alt gjekk fint føre seg. Ifylgje Klyve var det Skeie som hadde tipsa jentene om armbanda og som hadde tråden i prosjektet.

– God erfaring

Til saman 18 elevar på 8. trinn har innsats for andre som valfag i år, fortel Klyve. I løpet av året jobbar dei parallelt med ulike prosjekt. Hovudmålet er å læra om frivillig innsats og gjera seg erfaringar i sosialt entreprenørskap, i tillegg til å læra litt om ulike organisasjonar, forklarar han.

Medan jentegruppa har hatt armbanda som prosjekt, har andre elevar mellom anna selt sveler på Siderfestivalen, bidrege med leksehjelp på barneskular, hjelpt til i barnehagar, teke seg av kantinearbeid eller rydda på biblioteket på skulen.

Klyve hevdar at det er eit interessant fag der elevane lærer å engasjera seg i frivillig arbeid. Han er godt nøgd med innsatsen i gruppa.

– I år har det vore overraskande stort engasjement, fortel Klyve.

Dei som møtte opp, kunne anten laga armband som dei fekk behalda ved å betala ein liten sum, eller dei kunne levera inn det ferdige arbeidet. Pengane jentene fekk inn, skal fordelast likt mellom Kreftforeningen og Ung Kreft. Inntekta går direkte til kreftforsking og aktivitetar for unge som er råka av kreft og deira pårørande.