Pensjonistar sende «live»
Torsdag slo to pensjonistar til med ein direktesend reportasje frå den nye gardsbutikken til Fjærabygda Gardsdrift.
Dei to kringkastarane er Brita Træbakken (72) og Marie Elisabeth Skutlaberg (83). Førstnemnde hadde hovudansvaret for kameraet og det tekniske under sendinga, medan Skutlaberg var programleiar.
Reportasjen vart laga som eit såkalla Tematreff i Torefjell og send til publikum via den digitale møteplattforma Whereby. Alle tematreffa er direktesendingar.
Medan dei fleste føredragshaldarane sit på eit kontor eller i ei stove og snakkar direkte til tilhøyrarane, hadde Træbakken og Skutlaberg plassert eit webkamera på eit stativ. Dette var kopla til den berbare datamaskinen, og begge delar var plasserte på eit lite bord med hjul. Dermed kunne kameraet gli rundt i lokala og filma medan Georg Aarhus og Laila Melstveit Aarhus fortalde om mjølkeprodukta sine.
Her kan du sjå opptak av litt av opptaket:
– Betre enn sist
Træbakken fortel at dei to damene har laga liknande innslag til tematreff tidlegare.
– Me har leika litt med å bruka eit slikt laust kamera, men sendinga på torsdag vart langt betre enn desse. Me tek steg, seier ho.
Ho var likevel berre sånn passe nøgd med sendinga.
– Me har framleis eit forbetringspotensial, men det gjekk ikkje så verst. Me fekk litt applaus frå dei som hadde sett programmet etterpå. Sendinga var ikkje profesjonell, men det er heller ikkje meininga, seier ho.
For Træbakken er ikkje teknologien skremmande.
– Eg tykkjer heller det er spanande. Eg har alltid vore interessert i datamaskinar og byrja med data allereie på 1970-talet. Eg har vore borti både holkort og mykje ulikt. Ein får teknologien til å fungera om ein berre står på, seier ho.
– Sunt for datakompetansen
Tematreff i Torefjell oppstod som eit tiltak for eldre i ei tid der koronarestriksjonane var strenge. Likevel har tematreffa halde fram sjølv etter at restriksjonane forsvann. Træbakken fortel mellom 20 og 30 personar plar vera med på treffa. Det er ein fast gjeng på om lag ti personar som deltek kvar gong, og så er det ein del som koplar seg på dei gongene dei tykkjer temaet er interessant.
– Eg trur tematreffa er viktige for mange. Særleg om hausten og vinteren. For mange pensjonistar er det litt tiltak å koma seg ut når det er mørkt og glatt. Å vera med i Tematreff i Torefjell er veldig lettvint. Eg trur det er veldig sunt for datakompetansen til eldre, seier Træbakken.
Ho og Skutlaberg har ingen planar om å leggja kameraet på hylla med det første.
– Me håpar det vert fleire slike sendingar. Me har idear til program me kan laga til våren, seier Træbakken.
