– Pengar som verkeleg monnar

Sundag kjem bøsseberarar på dørene i Kvam. I år går pengane til å styrka kvinner i utsette område.

Det er organisasjonen Care Norge som i samarbeid med NRK står for årets tv-aksjon. Pengane skal gå til å skapa betre liv for kvinner i nokre av dei mest sårbare områda i verda: Niger, Mali, Den demokratiske republikken Kongo, Burundi, Rwanda, Myanmar, Afghanistan, Jordan og Palestina.

Mellom 150 og 170 personar skal gå med bøsser i Kvam i år.

Pengane går til tre konkrete tiltak: Ei spare- og lånegruppe som skal gi unge kvinner moglegheit til å skapa eigen arbeidsplass og inntekt, pluss opplæring i å leia gruppene og tilgang til banktenester; opplæring i seksuell helse og mødrehelse pluss helsetenester ved graviditet, fødsel og som nybakte mødrer, i tillegg til å engasjera menn for å få slutt på vald mot kvinner, og opplæring i politisk leiarskap og i deltaking og leiarskap i arbeidslivet og lokalsamfunnet.

Næss synest dette er viktige solidaritetstiltak.

– Mange stader i verda lever kvinner og jenter veldig utsett til. Dette arbeidet vil verkeleg monna. Pengane kjem fram og vil verta brukte til gode tiltak. Det vil verkeleg bety noko for kvardagen til dei som får hjelp, seier han.

I går var Næss og tre andre ordførarar samla i Kinsarvik til ein ringedugnad der dei bad om bidrag frå næringslivet. Næss seier det var god givarglede. Det har i skrivande stund komme inn over 30.000 kroner: 15.000 frå Kvam herad, og mindre summar frå andre lokale verksemder.

Næss viser til givarstafetten, der verksemder kan donera pengar og utfordra andre verksemder til å gjera det same.

I fjor vart det samla inn 409.742 kroner i Kvam. Det er den høgaste summen i heradet i løpet av dei fire åra oversikta til aksjonen viser.

– Eg håpar me kan matcha det i år, sjølv om det var ein populær aksjon i fjor, seier Næss.

I Jondal har det i skrivande stund komme inn 27.252 kroner. Også der har kommunen bidrege med 15.000 kroner. Også der var fjoråret sterkast samanlikna med dei tre åra før.