Pengane har kome på konto. Hardanger AKS er flytteklar.

Hardanger AKS kan omsider byrja å flytta ut av Sjusetevegen 67 i Øystese.

På vårparten i 2025 skal verksemda innlosjera seg i dei gamle lokala til den vidaregåande skulen i Steinsdalen, som får nytt skulebygg i Norheimsund.

Prosessen starta allereie i 2021, og den har vore lang. Men i sommar blei det klart at selskapet får totalt ni millionar kroner frå eigarane – Vestland fylkeskommune, Kvam herad og Samnanger kommune – til å flytta bedrifta.

Onsdag 27. november gav dagleg leiar Øyvind Aksnes formannskapet i Kvam ei grundig oppdatering. Bedrifta har vakse ut av Sjusetevegen, sa Aksnes til politikarane.

I Steinsdalen doblar verksemda nesten bruksarealet. I tillegg får den betre tilrettelegging og oppgradert standard.

– Det blir ikkje femstjerners og luksus, men det blir bra. Betre enn det me har i dag, sa Aksnes.

1,5 millionar i leige

Hardanger AKS skal leiga bygget i Dalatunvegen for 1,5 millionar kroner i året. Bergensaren John-Rene Curran Sæthre er dagleg leiar og deleigar i Dalatunvegen AS, som eig bygget.

Leigeavtalen er i utgangspunktet på 20 år, med mogelegheit for fem års forlenging om gongen.

Sæthre seier at han har kome Hardanger AKS kraftig i møte i forhandlingane:

– Den opprinnelege leigesummen var rundt 20 prosent høgare enn den me har landa på. Me har generelt strekt oss langt for å tilpassa oss Hardanger AKS sine behov.

Øyvind Aksnes er nøgd. Han seier at det ikkje vil bli dyrare å betala leiga enn det hadde vore å bli i Øystese. Årsaka er at utgifter som renter og avdrag på huslån, vedlikehald og vaktmeistertenester forsvinn.

– Akkurat den rekneskapen går i null, seier Aksnes.

Hardanger AKS skal leiga rundt 45 prosent av bygget i Dalatunvegen.

Dagens Hardanger AKS-base, Sjusetevegen 67, er lagd ut for sal, med ein takst på 6,5 millionar.

Som del av leigeavtalen har eigaren av Dalatunvegen forplikta seg til å legga inn bod på eigedomen.

Bodet, på fire millionar, er per i dag det einaste. Aksnes legg ikkje skjul på at han håper på høgare bod.

– Men det er marknaden som bestemmer. Om det skulle vera interesse her i rommet, er det berre å melda seg, sa han i eigarmøtet.

Sæthre vil ikkje kommentera kva han eventuelt skal bruka bygget i Sjusetevegen til.

Men per i dag er bygget regulert til næringsformål. Det vil ifølge Sæthre vera kostbart og tidkrevjande å omregulera til for eksempel leilegheiter.

Stat gir tre, herad tar to

Etter fleire krevjande år, hovudsakleg som følge av auka kostnadar, har Hardanger AKS hatt eit svært positivt 2024.

– Det har vore ein skikkeleg snuoperasjon, sa Aksnes.

Verksemda har sett rekord i omsetning nesten kvar månad.

Frå og med 1. oktober har også bedrifta fått tildelt tre nye VTA-plassar – plassar for varig tilrettelagt arbeid – frå staten.

Men i budsjettforslaget har Kvam herad foreslått å kutta i støtta til Hardanger AKS tilsvarande to slike plassar, til Aksnes si fortviling.

Rådmann Anita Hesthamar påpeika i budsjettmøtet i formannskapet seinare på dagen at heradet har oppretta fleire VTA-plassar sjølv, på Kan-skje kafé. Ho la vekt på trongen for mangfald i tilbodet.