Pendlarverksemder får køyrereglar også i Kvam

Også Kvam innfører retningsliner for verksemder som kryssar kommunegrensa.

Kvemmingane har dermed late seg inspirera av Ullensvang kommune, som sist veke innførte retningsliner for grensesprengjande verksemder.

Parallelt arbeider heradet med å kartleggja verksemdene med tilsette som pendlar til eller frå Kvam. Verksemdene vil verta følgde opp, fortel ordførar Torgeir Næss (Ap).

– Får me konkrete tips om dårleg hygiene på ein arbeidsplass, sender me dei vidare til Arbeidstilsynet, seier Næss, som opplyser at heradet har fått slike tips.

– Unngå handel

Kvam herad oppmodar verksemdene om mellom anna å laga skriftlege rutinar for å redusera smittefaren, å leggja til rette for heimekontor, å ha romsleg kontorplass, å unngå fysiske møte, å ikkje ha felles matøkter, å avgrensa kor mange som brukar garderobar samstundes og å ha strenge hygienerutinar.

Tilsette som overnatta i Kvam, skal kunna halda minst to meter avstand til einannan, skal ha minst mogeleg kontakt med omverda og skal ikkje handla i lokale butikkar. Kvar byggjeplass bør ha ein koronaansvarleg, heiter det i lista med råd.

– Gjer det me kan

Leigland bygg AS er ei av verksemdene som har byggjeoppdrag i Kvam i «koronatida». Verksemda reiser bustader for Hardanger brygge AS rett framom kontora til HF i Norheimsund. Om lag ti tilsette er i sving for tida, og dei fleste vekependlar frå Bergen.

– Me gjer så godt me kan og prøver å ta tiltaka på alvor, seier nestleiar i verksemda og prosjektleiar for bygginga i Kvam, Arvid Johnsen.

Han var ikkje kjend med dei nye retningslinene då HF kontakta han tysdag, men seier at verksemda tidlegare har informert dei tilsette om tilrådde smittevernstiltak og innført til dømes gode reinhaldsrutinar på den lukka byggjeplassen.

Dei tilsette i Kvam bur i Skjelbreidbygget. Alle er oppmoda om å halda god avstand til einannan, fortel Johnsen.

Etter å ha fått føringane refererte i grove trekk, slår Johnsen fast at det største betringspotensialet ligg i punktet som gjeld handel i lokale butikkar, sjølv om dei tilsette kjøper inn varer på førehand Han vil kontakta byggjeplassansvarleg og oppmoda om at ein vurderer å få på plass avtale om levering, slik heradet tilrår.

Leigland bygg hadde tysdag enno ingen smitta i staben, men har hatt folk i karantene.