Peikar ut kursen for hamner og kaiar

Ifylgje ein kaiinspeksjonsrapport frå 2023 har den kommunale kaien i Jondal sentrum, som er 38 meter lang og 13 meter brei, fleire kritiske manglar.

Han manglar redningsbøye, ein redningsstige og har defektar i kantlista. Ein del forskaling bør fjernast, og det bør setjast nye drensrøyr i hol. Frontbjelken har avskaling og rust. Kostnaden med å utbetra han er stipulert til 85.000 kroner.

Utbetring av kaien i Herand, som er 27 meter lang og 10 meter brei, hastar ikkje like mykje. Også her vantar redningsstige, pluss at kantlista er dårleg. Kaien har sprekkar og rust i hovudbjelkar, og dekket har sprekkar og avskaling. Stipulert kostnad er 40.000 kroner.

Samla utbetringskostnad med kaiane i kommunen er nær 2,9 millionar kroner, medrekna påslag på 30 prosent og moms. Vøla er eit av ti prioriterte tiltak i den strategiske hamneplanen.

Kaien i Herand har parkeringsareal som Herand Båtlag disponerer. Ifylgje planen er det uklart korleis kaien skal forvaltast, og utviklinga av han må sjåast på som ei eiga sak.

Kommunen har ti private gjestehamner, der nær halvparten ligg i Jondal – i Hessvik (14 plassar), på Hammaren (ikkje i bruk), i Jondal (15 plassar) og i Herand (25 plassar).

Fleire innspel

Som del av arbeidet med planen vart det 15. juni i fjor avvikla eit informasjonsmøte med næringsdrivande som nyttar sjøen. Mellom andre Fjord1 AS deltok. Inviterte bygdelag, derimot, stilte ikkje opp.

Ein av dei få som har sendt kommunen innspel i samband med at planarbeidet vart sett i gang, er Svein Kaptein Hovden i See the Fjords AS. Han tek til orde for mellom anna utviding av gjestebryggja i Jondal, som er 15 meter lang og har 8–10 plassar, og betre kaiforhold på Nå og Utne. Fyrstnemnde er altså teke med som eit prioritert tiltak.

Også Laila Bergsagel i Jondal sende innspel. Ho påpeika at det kjem ein del støy frå yrkesfartøy som ligg ved den kommunale kaien i Jondal. I kommentarane til innspela påpeikar rådmannen at ein god del av skipa ved den kommunale kaien ikkje melder frå til kommunen om at dei kjem. Kommunen skal skilta alle kommunale kaiar, og planen er å byggja ut landstraumanlegg i Jondal og krevja at båtane nyttar dette.

Frå null plan til plan

Hamneplanen er eit nytt påfunn. Ingen av dei tre gamle kommunane som smelta saman til Ullensvang kommune i 2020, hadde ein slik plan. Trongen for han freistar rådmannen forklara i planframlegget.

– Endringane i samfunnet nasjonalt og internasjonalt dei siste åra medfører at det er viktigare enn tidlegare at Ullensvang kommune har god styring på hamneverksemda, både nasjonalt og lokalt for å styrkja samarbeidet i regionen. Ullensvang kommune har lange transportstrekningar sjøvegen, og det er stor trafikk til industrikaiene (Boliden og Tizir), og like eins til og frå oppdrettsnæring i området Herand, Jondal og Hessvik. Strategisk hamneplan for Ullensvang kommune skal vere eit sterkt styringsverktøy som både skal gje retning og innhald i den kommunale hamneverksemda dei neste ti åra.

Ifylgje planutkastet skal planen klargjera mål for, ansvar for, forvalting av og finansiering av kaiar og bryggjer.

Framlegget er på høyring til 15. september, etter at politikarane utsette fristen rådmannen føreslo. Frist 31. juli var lite tenleg om målet var å få flest mogeleg innspel, meinte dei folkevalde då planen vart handsama.

Elles førte ikkje planen til politisk debatt då kommunestyret 19. juni vedtok å senda planframlegget på høyring.