– Vil ha innspel frå næringslivet

Politikarane vil investera 300 millionar kommunale kroner i 2020 og sjå om prosjekt kan framskundast. Målet er å halda hjula i gang.

I ei pressemelding som Roald Aga Haug (Ap) har sendt ut på vegner av gruppeleiarane fredag, vert det hevda at investeringssummen truleg er rekord og langt meir enn det som er vanleg i norske kommunar. Lokale selskap vil verta sterkt involverte i prosjekta, lovar politikarane.

Ynskjer sams prosjekt

Dei ynskjer å involvera næringslivet i ein idédugnad for å skapa felles prosjekt som kan gje omsetning og sysselsetjing. Det er allereie kome mange innspel, etter ei kartlegging som næringssjefen og Næringshagen i Odda har utført av verksemdene.

Eit innspel som har vorte aktuelt, er eit ynske om å bruka ekstrapotten med pengar som regjeringa løyver til flaum- og skredsikring lokalt. Gruppeleiarane har teke opp fleire aktuelle prosjekt, mellom anna Stølselva på Hildal, Tobekken og Storebekken på Aga, sikring ved Tyssohallen og taksikring i Tyssedal. Ordføraren har drøfta tiltaka med Noregs vassdrags- og energidirektorat.

– Felles er at det er gjort grundig førearbeid og at ein kan setja i gang på svært kort varsel. Slike tiltak gjev erfaringsmessig lokale firma oppdrag. Dette kan me utnytta sterkare no i ein situasjon med nasjonale restriksjonar, heiter det i pressemeldinga.

Spår større vanskar

Gruppeleiarane meiner ein må bu seg på at fleire vil få økonomiske vanskar som følgje av dårleg omsetning. Politikarane lovar å ha kontakt med stortingspolitikarar for å synleggjera lokale behov og sikra ein større del av krisepakkane til distriktet i staden for til «milliardærar som også er dyktige på å utnytta krisepakkar til sin fordel». Gruppeleiarane meiner at ein del av tiltaka til regjeringa er tilpassa til bynære område og store føretak.

Næringslivet i Ullensvang er mindre råka enn i mange andre kommunar i Vestland, opplyser dei folkevalde, som minner om at dette kan snu. Dei ynskjer innspel til næringssjefen og næringshagen for å få godt oversyn.

Ifølgje meldinga arbeider politikarane på brei front for å stilla opp for dei næringsdrivande. Dei oppmodar verksemdene om å sjå framover og tenkja på marknadsføring både i år og neste år. Det vert vurdert å styrkja rettleiingstenesta gjennom næringshagen.

– Å handla lokalt har aldri vore viktigare, skriv gruppeleiarane, som har hatt telefondialog om situasjonen i næringslivet.