Parkeringshus i Norheimsund?
Både riving av hus, einvegskøyring i Grovagjelet og bygging av parkeringshus kan verta aktuelt for å få nok parkeringsplassar rundt rådhuset og den nye vidaregåande skulen i Norheimsund.
Gåande, springande og syklande. Små skuleborn, ungdomar og vaksne. Mopedar, bilar og bussar. Når alt skal samlast innanfor eitt område, krevst god planlegging.
Totalt trengst om lag 250 parkeringsplassar i området, ifylgje rådmannen. Talet er basert på ein trafikkanalyse utført av Norconsult AS i samband med skulebygginga. Det er like mange som er i dag, sjølv om det totalt sett vert fleire tilsette.
113 av dei eksisterande parkeringsplassane vil forsvinna i byggjeprosessen. Om ein tek med parkeringsplassar som allereie er teikna inn i planane, er det reelle tapet 75 plassar.
Rådmannen har lagt fram fleire forslag og bede heradsstyret om ei tilbakemelding om kva løysing eller løysingar det er ynskjeleg at administrasjonen jobbar vidare med. Saka skal opp i formannskapet 13.–14. juni.
All trafikk i Grovagjelet
Ein utomhusplan for rådhuset vart orientert om i formannskapet allereie i februar. For å sjå om det er mogleg å få til ein alternativ infrastruktur, har administrasjonen halde fram med å sjå på ulike løysingar.
Kravet i arealdelen av kommuneplanen er 0,6 parkeringsplass per tilsett. «Utomhusløysinga», som vart orientert om i vinter, går mellom anna ut på å ha to parkeringsplassar på baksida av rådhuset og laga til ein einvegskøyrd veg rundt bygget. Planen gjev ein auke på 55 parkeringsplassar, og vil kosta om lag ti millionar kroner inkludert grønområde. Ut frå dagens situasjon og ein eventuell auke i arbeidsplassar i sentrum er det trong for minst 20 parkeringsplassar til, skriv rådmannen i sakspapira.
Med fleire parkeringsplassar kjem utfordringar med trafikktryggleik i området. Den godkjende reguleringsplanen for Kvam vidaregåande skule vil føra til at ein etter bygging av skule og uteområde står att med berre to tilkomstvegar til rådhuset: Grovagjelet og Gamle Sandvenvegen. Sistnemnde er planlagt stengd for biltrafikk og omgjord til gangveg. All trafikk til rådhuset vil såleis gå opp og ned Grovagjelet i framtida.
Alternativt kan Grovagjelet verta einvegskøyrt. Då vert utkøyringa mot fylkesvegen ned langs Bruflatbygget.
Positiv huseigar
For å gjera Grovagjelet einvegskøyrt, må «Sara Sunde-huset» i Gamle Sandvenvegen flyttast og tomta gjerast om til parkering. Eigaren av huset er positiv til løysinga, som vil føra til tryggare trafikkavvikling, ifylgje rådmannen. Huseigaren vil eventuelt flytta huset lenger bort i Gamle Sandvenvegen og utvikla området med gamalt bygningsmiljø.
Alternativet vil føra til at behovet for vegareal i Grovagjelet vert mindre, og at området kan utviklast betre med tanke på grønområde og utvida opphaldsrom i sentrum, skriv rådmannen.
Flytting av hus, innløysing av tomt, ny vegløysing og ny parkeringsplass til om lag 20 bilar vil truleg kosta mellom 10–12 millionar kroner. Løysninga krev ny reguleringsplan.
Nett som i «byd'n»
Eit anna alternativ er å etablera parkeringshus på Spar-tomta. Geirmund Storaas har tankar om å utvida parkeringskapasiteten, og har saman med ein arkitekt sett på ei løysing med to plan. Delar av tomta er på kommunal grunn, og Storaas er interessert i eit samarbeid med heradet i prosjektet.
Parkeringshuset vil gje 180 plassar totalt. 49 av dei eventuelt vert kommunale. Kostnaden for heradet vil vera om lag 15 millionar kroner.
Om ein går inn for alternativet på Spar-tomta, bør eksisterande parkering ved rådhuset reserverast for tenestebilar og besøkjande, meiner rådmannen.
Det siste alternativet er å riva huset nedom bedehuset og laga til ein parkeringsplass på tomta. Heradet har nyleg kjøpt huset for om lag tre millionar kroner, opplyser rådmannen. Kostnaden med riving og etablering er venta å vera om lag 3,5 millionar.
Løysinga krev ei endring av gjeldande plan, men vil truleg vera relativt rask å gjennomføra, ifylgje rådmannen.
– Inneber forhandlingar
Det er «utomhusplanen» som er svaret på bestillinga frå heradsstyret, og dei andre alternativa har kome til undervegs. Fleire av dei kan kombinerast.
Rådmannen meiner både alternativet med «Sara Sunde-huset» og parkeringshus vil betra trafikktryggleiken. Løysinga med parkeringshus vil dessutan auka sannsynet for utvikling av eit nytt bustadområde i sentrum, skriv ho. Begge alternativa inneber forhandlingar og avtalar med private grunneigarar.
Alternativet med å laga parkering nedom bedehuset er det rimelegaste alternativet, men det gjev truleg liten auke i trafikktryggleiken.
Her er dei ulike alternativa:
