– Papiravisene syng på siste verset
Stadig fleire aviser kuttar i papirutgåvene sine. BI-professor Erik Wilberg trur papiravisa er på veg heilt ut.
– Papiravisa syng på siste verset, seier Erik Wilberg, dosent på BI i Bergen til NRK Innlandet.
Han trur det er første steg i ein avviklingsprosess før papiravisa er historie. Etter kvart som fleire og fleire aviser digitaliserer seg, meiner han at dei burde satsa på nett.
Artikkelen held fram under annonsen.
Administrerande direktør i Mediebedriftenes Landsforening er usamd. Ho trur at mediehusa kan forlengja levetida til papiravisa ved å gje henne ut sjeldnare, men med meir innhald. På den måten kan dei satsa digitalt, men samtidig òg redusera kostnader og behalda den tradisjonelle papirutgåva.
– Det er viktig at avisene er med på digitaliseringa. Det er måten ein kan løysa samfunnsoppdraget endå betre framover, inn mot nye generasjonar som vil ha den heildigitale forteljinga.
Måndag blei det kjent at tre lokalaviser i Innlandet, Østlendingen, Glåmdalen og Oppland Arbeiderblad skal gå frå seks til tre papiraviser i veka.
– Signala er heilt tydelege på kva publikum vil ha. Dei vil ha ei knakande god digitalavis, seier ansvarleg redaktør og dagleg leiar i Østlendingen Tom Haakenstad.
(©NPK)
