Pakkar mat til andre

Tysdag pakka 11 medlemer frå Lions Club Norheimsund og Lions Club Strandebarm 65 kassar med mat.

Kvar «julekasse» har ein verdi på 940 kroner, seier leiar Gunnar Eiken i sosialkomiteen i Lions Club Norheimsund. Han får aldri nei når han spør om hjelp til den over ti år gamle tradisjonen. Kassane skal leverast til dei i Kvam som treng hjelpa.

Veit ingenting

Det er barnevernet, flyktningtenesta og avdeling for rus og psykisk helse i Kvam herad som avdekkjer behovet og distribuerer kassane. Mottakarane er ukjende for pakkarane.

– Eg trur det er folk som har behov for det. Det er nærliggjande å tenkja at det er barnefamiliar og flyktningar blant mottakarane, men me veit ingenting om nokon, seier Eiken.

Tidlegare har det blitt delt ut frå 50 kassar og oppover, seier Eiken. Han fortel at det vert fleire for kvart år. Lions-klubben får vita kor mange kassar som trengst, og prøver å hjelpa alle. Som tidlegare år fann pakkinga stad i Gamleskulen på Norheim.

Boksane stod på rekkje og rad på langbordet, og var fylte med mellom anna klementinar, kjeks, tørrvarer som saus og suppe, pålegg, kaffi, te, godteri og røykjelaks.

Bok og gåver

Pengane kjem frå inntektene frå «Lionsboka» – tidlegare Lions-katalogen. Eiken seier at alle husstandar i Kvam får boka. Inni henne ligg ein giro. Dei som vil, betalar rekninga – og det er det heldigvis mange som gjer, seier han.

I tillegg har matprosjektet fått 10.000 kroner frå ein næringsdrivande i Norheimsund, og den same summen frå Øystese Sanitetslag.

Eiken seier det er i Lions si ånd å hjelpa andre, spesielt dei som strevar i samfunnet. Han seier at organisasjonen har særleg omsut for born, eldre og dei som har det tungt. Mellom anna har organisasjonen nyleg donert 3.000 kroner til julebord for medhjelparane på Kan-skje kafé i Norheimsund. Då får dei i det minste litt pinnekjøt, seier Eiken.