På turné med Aurora
Trommis Sigmund Vestrheim frå Øystese hadde store planar om å vera i studio og produsera musikk denne hausten. Ein telefonsamtale endra planane.
Denne veka spela musikaren sin fyrste konsert saman med Aurora – som også slektar til Øystese. Måndag var fyrste arbeidsdag. Då HF prata med Vestrheim fredag, var han i Nederland for å spela på Lowlands Festival i Biddinghuizen.
Saman med bandet skal han turnera i Europa fram til midten av september. Etter det vert det meir tid til det han eigentleg hadde planar om – å skriva mykje ny musikk og få ferdigstilt prosjekt som er i gang med mellom anna GiddyGang, som han er ein del av.
At planane vart utsette, gjer kvemmingen ingenting.
– Det er jo dette eg vil!
Ein feinschmecker?
Vestrheim synest turnélivet er «ganske greitt». Heller bussing enn fyking.
– No i Europa er det turné med buss. Då er det behageleg. Me heng i bussen, spelar, søv, vaknar i rett by og så er det det same om att, fortel 23-åringen.
Etter to års pandemipause er han ikkje like van med å vera på tur som før. Vanane har endra seg litt i pandemitida, men Vestrheim tykkjer likevel det er moro å vera på reis att.
– Det er lenge å vera vekke frå «damo», men utanom det er det heilt topp. Eg får sjå mange kule stader og får eta masse god mat, fortel han.
Då han var trommis i Boy Pablo, var ikkje resten av bandmedlemene så opptekne av god mat. No er han i ein gjeng som diggar «fine dining» og som er interessert i vin. Det passar han bra. Trommisen er nemleg også tilsett i vinbaren Becco i hovudstaden, og slår eit slag for både naturvin og spanande smakar.
– Uvant
Vestrheim, som har ein bachelor i utøvande rytmisk musikk, seier det er uvant å spela så arrangert musikk. Han er mest van med jazz, funk, hip hop og rock. Dette er meir eit popprosjekt. Ei kul erfaring å ha, og veldig kjekt å få vera med på, fortel han.
Han som tidlegare spela trommer for Aurora, Magnus Skylstad, er også produsent og har vore med på å skriva mange av låtane til popstjerna.
– Korleis fungerer det: Må du spela heilt likt?
– Eg må gjera det som er låtane, og læra det han har gjort. Eg tek i alle fall utgangspunkt i det, men eg har fått beskjed om at eg må spela slik eg synest er kjekt. Litt forskjellig vert det – me er forskjellige folk, seier Vestrheim.
