På langtur i rosa
Mait Lohmus trur han har endra røykjelova i Mexico. Torsdag sat han i rosa klede og åt tunfisk og rødbetar i Kvam.
Fleire sperra nok opp augo då det torsdag sykla ein mann iført dei kjende, rosa kleda til føretaket foodora gjennom Kvam. Føretaket driv med henting og levering av mat i store byar, faktisk langt større enn både Norheimsund og Øystese.
– Eg er på veg frå Bergen til Oslo, seier Mait Lohmus.
Når HF møter mannen i rosa, har han sett seg for å eta ved ein benk i Evighetssvingen. På menyen står raudbetar og tunfisk i hamburgarbrød.
– Eg har jobba som foodorabod i Bergen, fortel Lohmus.
Dei einaste vasstette ytterkleda han hadde, var dei han fekk gjennom jobben. Den store, rosa sekken er òg med av praktiske årsaker.
– Eg måtte ha ein plass å lagra all maten.
Kjempar mot tobakken
Sjølv om HF er mest interessert i å høyra om den strabasiøse ferda, ynskjer Lohmus heller å snakka om sitt engasjement mot tobakksrøyking. I og med at det er agurktid, lèt journalisten han få viljen sin.
– Under koronapandemien sende eg e-post til alle statar i verda om å totalforby røyking i offentleg rom, seier Lohmus.
Han fekk ikkje svar frå mange, men eitt land gav svar på tiltale.
– No er det forbode å røykja i offentlege rom i Mexico, seier han.
– På grunn av breva du sende?
– Eg trur mykje av grunnen ligg der, ja.
Han merka sjølv den negative effekten passiv røyking hadde på han då han arbeidde på eit skipsverft i heimlandet, som er Estland.
– Når det berre var folk som ikkje røykte på jobb, kjende eg meg mykje friskare.
Har jobba over heile verda
Før estlendingen byrja å køyra ut mat til svoltne bergensarar, har han jobba mange stader. Forutan skipsverftet heime har han jobba på Tenerife og i Dubai.
– Kleda eg hadde med frå Dubai, held ikkje over fjellet, seier han.
Men det er ikkje fyrst og fremst noregsferie som lokkar baltaren ut på vegen. I Oslo ventar nemleg ein ny jobb.
– Eg trur ikkje det vert så mykje foodorakøyring der, for eg skal jobba med stillas.
Og om batteriet på elsykkelen ikkje held heile vegen, har han planen klar.
– Eg tek kanskje toget frå Voss, seier han.
Vart lagt merke til
Det var mange som sperra augo opp for matbodet på veg gjennom Kvam. Eit av stoppa hans var bensinstasjonen i Steinsdalen.
– Eg synest det var litt kuriøst, seier Randi Brekke, som driv stasjonen.
Lohmus var ikkje innom for å kjøpa mat, for føda hadde han i sekken. Andre som la merke til syklisten, undra kanskje om matbodtilbodet er kome til Kvam.
– Nei, eg skal vidare austover, forsikrar Lohmus.
Ifylgje kommunikasjonssjef i foodora, Mads Blybakken, er det forskjell på reglane om bruk av arbeidsklede på privaten. Lohmus, som ikkje er tilsett i føretaket, har litt større spelerom enn dei fast tilsette. Det gjorde det mogleg å promotera dei rosa sykkelboda i Kvam. Men dei som håpar på eit varmt måltid levert på døra av rosa menneske i Hardanger, må nok smørja seg med litt tolmod.
– Ein skal aldri seia aldri, men eg kan ikkje koma med lanseringsplanar i Kvam no, seier Blybakken.
