På landevegen med fisk i tankane

Utnemninga fann stad på årsmøtet til rådet 15. mars, vert det opplyst i ei pressemelding. Dagleg leiar og eigar Jarle Tveiten fekk eit diplom og eit grafisk arbeid laga av Kristian Finborud som synlege prov på utmerkinga.

Jarle Tveiten Transport er den største transportøren av levande fisk på bil for havbruksnæringa i landet. Verksemda har frakta levande fisk med lastebil sidan 1987, opplyser næringsrådet i pressemeldinga. Føretaket fraktar fisk i alle storleikar langs heile norskekysten.

Føretaket har ti store vogntog med ulike typar tankar. Under transporten held fleire system oversikt over korleis fisken har det. Utviklinga i fiskevelferd har vore stor i løpet av 36 år, ifylgje Tveiten. Ambisjonen til verksemda er å vera den beste transportøren av levande fisk i Noreg.

Føretaket er sertifisert etter den internasjonale Global G.A.P.-standarden, og arbeider for å verta sertifisert etter det nasjonale kvalitetsprogrammet Fair Transport, heiter det i pressemeldinga.

Ingen av bilane til selskapet er eldre enn fem år, og dei har dei mest miljøvenlege løysingane som er i marknaden. Transport av levande last stiller store krav til sjåførane, fortel den daglege leiaren. Jarle Tveiten Transport har i dag 12 tilsette og ein lærling.

– Me har ein stabil arbeidsstokk der alle dreg lasset saman og står på i hektiske periodar. Dette er eit lagarbeid, seier Tveiten i pressemeldinga.

Bilane er utrusta for overnatting, og på dei lengste turane er det to sjåførar på bilen som byter på å køyra.

I 2022 starta bygginga av ny base for selskapet på Valland, og i løpet av 2023 reknar ein med at alt er klart til å samla verksemda på éin stad. På Valland får verksemda administrasjonsbygg, garasjeanlegg med vaskeanlegg for bilar og tankar, overdekt parkering og lager.

Mykje av energien som trengst til å driva anlegget, vil koma frå solfangarar på taket som varmar opp vatn mellom anna til vask av tankane mellom oppdrag. Investeringa på Valland vil gjera den daglege drifta enklare og meir effektiv.

Omsetninga dei siste åra har vore i underkant av 30 millionar kroner, og 2022 vart eit godt år med ny rekordomsetning på 34 millionar kroner, går det fram av pressemeldinga frå næringsrådet.