Øystese Røde Kors markerte 100-årsjubileum med kake og stand på Tunet i Øystese laurdag.

Øystese Røde Kors markerte milepæl

Øystese Røde Kors markerte 100-årsjubileum laurdag. – Det er framleis stort behov for oss i samfunnet, fortel styreleiar Andreas Jacobsen.

Journalist
Publisert Sist oppdatert

Jacobsen fortel at han har vore medlem sidan han var 16 år. Han synest det er gjevande å driva med humanitært arbeid. Jacobsen vart med i hjelpekorpset og deltok i vinteraktivitetane ved Røde Kors-hytta i Hamlagrø.

Jacobsen opplyser at Øystese Røde Kors har kring 150 medlemmar. Han vonar å arrangera fleire tilstellingar som kan føra til vekst i medlemstala.

Dei siste åra har Øystese Røde Kors jobba mykje med å flytta inn i dei nye lokala i Merwyn-bygget i Øystese, fortel han.

I 2023 flytta Øystese Røde Kors ut av lagshuset i Øvre Vik i Øystese. Det vert no nytta til å hysa BUA-ordninga.

Jacobsen seier det var naudsynt å byta lokale. Det gamle lagshuset i Øvre Vik var utdatert og kravde mykje vedlikehald. Det nye lokalet har meir lagerplass. I Merwyn-bygget er det to garasjar som organisasjonen nyttar til å lagra køyretøy, fortel leiaren.

– No står alt klart til når ein treng det, også til utrykking, seier Jacobsen.

Frå venstre: Vilde Floen Gravdal, Kaja Høen Mo og Helena Botnen Lilletveit, som er med i Barnas Røde Kors, delte ut små boksar med fyrstehjelpsutstyr laurdag.

Populære tilbod

Leiaren fortel at Barnas Røde Kors (BARK) og Røde Kors Friluftsliv og Førstehjelp (RØFF) er populære tilbod som gjev deltakarane innblikk i kva Røde Kors held på med.

Jacobsen seier at det har vore ventelister for å delta. Han håpar at tilboda kan medføra at deltakarane har lyst til å vera med i organisasjonen når dei vert eldre.

– Me treng fleire frivillige. Alle er velkomne til å vera med, påpeikar Jacobsen.

Alida Constanse Fonneland, leiar i hjelpekorpset, viser fram namna til dei som bygde Dyrbu. Det er hytta Røde Kors har i Hamlagrø. Ho stod ferdig i 1967.

BARK rettar seg mot dei yngre borna i alderen 6–13 år, og RØFF rettar seg mot ungdomar mellom 13 og 17 år. Deltakarane i RØFF er med hjelpekorpset på aktivitetar. Då får deltakarane læra om fyrstehjelp og redningsarbeid, fortel Jacobsen.

Når deltakarane er for gamle til å vera med i RØFF, kan dei tre inn i hjelpekorpset, fortel Jacobsen.

Andreas Jacobsen fortel at Øystese Røde Kors bidreg til fleire arrangement. Her er han på snøscooter i høve Torefjellsrennet i 2023.

– Framleis behov

Jacobsen seier at Øystese Røde Kors skal markera 100-årsjubileet minst ein gong til i løpet av året. Ein komité er i gang med å planleggja.

– Det vert ei større markering, fortel leiaren.

Jacobsen understrekar at Røde Kors framleis trengst i Noreg. Han fortel at organisasjonen har ei viktig rolle, særleg i beredskapsarbeidet.

– Det er ikkje berre eit behov for Røde Kors, det er eit aukande behov, påpeikar Jacobsen.

Vigdis Rykkje viser fram ei gamal bok. Dei fyrste sidene stammar frå eit møte i Øystese i 1925.
øystese røde kors hjelpekorps frivillighet fritid nyhende øystese
Laga med Labrador CMS