Øystese-restaurant vart best på sider
Ingen i Noreg har betre sidermeny enn Glime restaurant i Hardangerfjord Hotel.
I alle fall om ein legg tevlinga Norges beste vinkart til grunn. Sundag vart det klart at restauranten gjekk heilt til topps i kategorien beste siderliste.
Christer Økland er direktør for mat og drikke i Fjordtind Hotels. Han var til stades i Oslo og tok imot prisen.
– Dette er kjempestort. Det er første gong sider er ein kategori. Då er det gjævt å vinna, seier han.
Han trur lokaliseringa i Hardanger er ei av årsakene til prisen.
– Me ligg midt smørauga og arbeider tett med mange av produsentane me har på lista. Dessutan er sider eit satsingsområde for oss. Me skal vera størst og best på sider. Då er det kjekt å få løn for strevet. Dette skal me bruka for det det er verdt i marknadsføringa, seier han.
Restauranten var også ein av seks nominerte til Norges beste «lille vinliste», men klatra ikkje heilt til topps i kategorien.
Norsk Vinkelnerforening, Star Wine List og Kapital står konkurransen. Finalen var under Sommelierens dag på Hotel Bristol.
