– Overlèt roret med godt samvit
Etter nesten åtte år som hotelldirektør ved Thon Hotel Sandven sender Arnstein Birkeland roret vidare til lokale krefter.
Fredag 26. mai var hans siste arbeidsdag på hotellet i Norheimsund. No vert det avvikla ferie, og 30. juni skjer det offisielle bytet. Då skal kvemming Marie Skutlaberg Kjøsnes styra hotellet vidare, medan Birkeland trer inn i pensjonisttilværet.
– Eg overlèt roret til henne med godt samvit og med tru på at ho heilt sikkert vil lukkast. Og ikkje minst så er ho lokal, seier den avtroppande direktøren.
– Det vert utfordrande, men spanande. Eg gler meg. Eg er klar for nye utfordringar, seier Kjøsnes.
Godt kjend
Den komande direktøren har vore tilsett ved hotellet i ganske nøyaktig ti år når ho tek over stillinga. Dei siste åtte åra har Kjøsnes hatt stilling som hotellsjef med resepsjonsansvar, og ho har steppa inn når Birkeland har hatt ferie.
– Eg synest det er ein veldig kjekk bransje. Det er aldri ein lik dag. Å ha kontakt med gjestene er veldig moro. Så eg likar meg godt, seier kvemmingen.
I motsetning til Birkeland starta ho nemleg arbeidslivet utanfor bransjen. Jobbar i både bank og møbelforretning vart prøvd før ho søkte seg til hotellet. No kjenner ho både bygget og dei tilsette godt.
– Vil tilsette og gjestar merka nokon skilnad?
– Eg håpar ikkje det. Det vil verta ein overgang og nokre rokeringar med kven som gjer kva, men eg trur ikkje nokon vil merka forskjell, seier Kjøsnes.
– Vemodig
Ei oppleving tidleg i ungdomen peika ut vegen til hotellbransjen for Birkeland. Bergensaren var med på eit dansearrangement, og deltakarane måtte hjelpa til i serveringa. Det fall i smak.
– Eg fekk kjensla av at det å treffa folk og sjå at dei vart nøgde, gav meg veldig mykje energi, fortel Birkeland.
No er arbeidslivet straks over, og det kjennest litt vemodig, vedgår han, men han understrekar at han har valt det sjølv.
– Planen var å jobba til fylte 70, men eg tenkjer at når eg har vore i dette faget i over 50 år, så er det nok. Eg vil nyta pensjonisttilværet når eg er pigg og kjekk. Ein veit jo aldri korleis livet er når ein er 70, seier hotelldirektøren.
Aktivitet og utvikling
Då Olav Thon og hovudkontoret spurde om Birkeland kunne tenkja seg å jobba i Norheimsund, var det nytt for han å jobba på ein liten stad. Han hadde inga tilknyting korkje til bygda eller kommunen.
– Eg må seia at eg har vorte teken godt imot. Eg kjem til å sakna alle saman – frå ordføraren til personar i gata. Det vil vera vemodig ikkje å vera her meir, men eg kjem nok til å stikka innom, seier den komande pensjonisten.
Det er nokre innhaldsrike år Birkeland ser tilbake på, og han trur det vil skje mykje spanande også framover. Han fortel at Norheimsund skal verta eit reisemål, slik som Lofoten. Aktivitet og utvikling er sentrale stikkord.
