Ottast vassmangel utan grunn
– Er drifta av kraftverket i Stampaelva i tråd med konsesjonen? undra Frode Strønen. Konklusjonen til styresmaktene er ja.
Strønen varsla Statsforvaltaren i Vestland då han 1. september såg ein tørr terskel på demninga og stor avstand frå kanten til vassyta i elva ovanfor Torsnes i Jondal. Han undra om tilhøva er i samsvar med konsesjonen for anlegget til Småkraft AS.
Statsforvaltaren varsla rett instans, Noregs vassdrags- og energidirektorat, som har henta inn kommentarar frå konsesjonæren.
Konsesjonen frå 2019 tilseier at minstevassføringa skal vera 580 liter i sekundet 1. mai–30. september. Om tilsiget er mindre, skal alt vatn sleppast forbi og kraftverket vera ute av drift. Sistnemnde situasjon var tilfellet i perioden 1. september–8. september, opplyser Småkraft. Stoda er dokumentert i ein logg.
– Ut frå dei opplysningane me har i saka, er dette i samsvar med krava i konsesjonen, og saka er med dette avslutta frå NVE si side, heiter det i tilbakemeldinga til Strønen.
