Ottast pengemangel i kyrkja i Kvam
Etter tre månader hadde kyrkja gått med vel ein halv million kroner i underskot.
Det syner årets fyrste kvartalsrapport, som fellesrådet drøftar 8. mai. Meir eksakt var underskotet på 533.000 kroner, som er om lag 0,8 millionar kroner dårlegare enn budsjettert.
Kyrkjeverje Olav Skeie Lid meiner det er grunn til å vera uroa over at det ikkje er samsvar mellom ressursane og oppgåvene. Framlegget til rådet er å ha dialog med kyrkja om problemstillinga.
I sakspapira listar han opp fleire faktorar som medverkar til dei raude tala. Mellom anna nemner han ein kald vinter med høge straumprisar – faktisk er godt over halvparten av årsbudsjettet bruka opp etter tre månader – og nok ein gong monaleg større pensjonspremie enn venta. I tillegg er det venta eit godt lønsoppgjer.
– Drifta er hardt pressa og framstår som underfinansiert. Me har redusert kraftig på personalsida og teke ned kostnader alle stader, men det monnar likevel ikkje, skriv kyrkjeverja.
Han meiner det til tider kjennest «nesten litt uverdig» å ha så dårleg likviditet.
Kyrkjeverja presiserer at kvartalsrapporten ikkje bør nyttast som eit eksakt uttrykk for endeleg resultat, sjølv om inntekter og utgifter skal vera periodiserte.
