Ottast frostskadar i hytter
— Mange hytteeigarar risikerer å møta ei frostskadd hytte.
Det melder Tryg Forsikring i ei pressemelding. I det siste har det vore svært kaldt i Noreg.
— Me opplever stadig at fleire får vass- og frostskadar på hytta, seier kommunikasjonsrådgjevar Torbjørn Brandeggen i Tryg Forsikring.
Han opplyser at erstatningsutbetalingane etter slike skadar har auka med over 60 prosent dei siste tre åra. Og skadane vert stadig dyrare å utbetra. I dei verste tilfella må røyr, golv og vegger fornyast.
I fjor vart over fem tusen slike skadar registrerte i Noreg. Dei fleste skuldast at vatnet ikkje var stengt av, eventuelt at temperaturen vert så låg at vassrøyra frys. Både eldre og nye hytter vert råka.
Ein del hytter har fjernstyrte varmeomnar, men dei er sårbare i samband med straumbrot, påpeikar Brandeggen. Helst bør ein syta for tilsyn med hytta nokre gonger i ein kuldeperiode. Om det lek vatn, skal det lite til før skadane vert svært omfattande.
Om ein slurvar med oppvarminga som vert kravd for å unngå frostskadar, risikerer ein å få mindre i erstatning. Eit absolutt krav er at vatnet skal vera stengt av når hytta ikkje er i bruk, ifølgje forsikringsselskapet.
