Ordna hjartesak i ein fei

Det livreddande apparatet heng på veggen til Coop Marked Tørvikbygd.

– Me kom på at det var litt langt mellom hjartestartarane her ute. Det var to her i bygda frå før, den eine innelåst på skytebanen i Vangdalsåsen og den andre innanfor porten på Hardingsmolt, seier Måge.

Plasseringa til hjartestartarar finn ein på 113-appen.

– Me tenkte at alle bør kunna få tak i han. Det vart laga eit spleiselag mellom tre lag og 12 verksemder. Med ein boks som har varme og alarm, kosta det kring 17.500 kroner med moms, seier Måge.

I ein fei

Martin Steine sytte for straum til startaren. Det var full oppslutnad om tiltaket, og det tok berre eit par dagar å få samla inn pengane etter at han lanserte ideen på Facebook. Måge fekk gode tilbakemeldingar, både frå hyttefolk og fastbuande.

– Det er kjekt å ha den tryggleiken som hjartestartaren gjev. Så får me håpa at det aldri vert bruk for han, seier han.

Det var eit tilfelle i sommar der ein ville hatt nytte av ei slik innretning. Då kom det ein ambulanse.

Men å halda på med hjartekompresjon i lengda, åleine, er det ikkje så mange som klarar. Då er det greitt å ha ein hjartestartar i nærleiken.

– Me må prøva ta vare på innbyggjarane våre og hyttefolk, seier Måge.

Vurderer kurs

Han har òg byrja forhøyra seg om å halda fyrstehjelpskurs, eit gratiskurs for dei som har lyst til å vera med. Det kan verta snakk om kurs i bruk av hjartestartar og hjarte-lunge-redning i lokala til Berge Gard og Gartneri.

Mange får ikkje slike kurs. Fyrstehjelpskurs vert ikkje lenger tilbode i barne- og ungdomsskulen.

– Kanskje det er for å spara pengar, utruleg nok. Det burde vore obligatorisk, spør du meg, seier Måge.

Måge arbeider til dagleg i Conocophillips, og har sitt eige firma.

Tørvikbygd har kring 650 innbyggjarar.