Ordførar rekrutterte lærarar til vidaregåande skule
Kvam vidaregåande skule lukkast ikkje med å rekruttera lærarar og stod i fare for å mista ein klasse i teknikk og industriell produksjon (TIP). Etter førespurnad frå Frode Nygård har to sagt seg villige til å undervisa.
Før helga vart det kjent at at den eine av dei to planlagde TIP-klassane på VG1 i Kvam måtte kuttast ut, sjølv om det er mange nok søkjarar til to klassar.
Årsaka er at skulen ikkje har lukkast med å rekruttera lærarar i faget, ifølgje eit notat til hovudutval for opplæring og kompetanse frå fylkesdirektør Bjørn Lyngedal.
Overtalingskunst
Det kan likevel vera håp om å berga klassen. Meldinga frå utvalseleiaren fekk fungerande ordførar Frode Nygård til å reagera. Han meiner tilbodet er så viktig, ikkje minst for rekruttering til lokalt næringsliv, at han sette i sving sin eigen rekrutteringsprosess.
Etter nokre dagar hadde han fått tak i to personar – Steinar Steine og Olgar Neteland – som var villige til å undervisa på deltid. Steine har vore avdelingsleiar og TIP-lærar på skulen tidlegare, og er i dag tilsett ved Lid Jarnindustri AS. Verksemda har gått med på ei løysing der Steine vert «lånt vekk» til skulen eit par dagar i veka. Også Neteland har vore TIP-lærar på skulen før. Han er no tilsett i Kvam herad. Steine har informert arbeidsgjevaren, og Nygård har teke saka med rådmannen.
Steinar Steine seier at omsynet til elevane som står i fare for å mista TIP-plassen, var utslagsgjevande for at han takka ja etter å ha drøfta saka med seg sjølv. Dessutan trur han det er viktig å berga tilboda om det skal vera von om å få den planlagde skulen i Norheimsund. Neteland har ei liknande forklaring.
– Yrkesfag er viktig, og eg brenn for opplæring, seier han.
Nygård opplyser at VG1 i TIP skal ha 29 søkjarar i år. Berre halvparten vil få tilbodet i Kvam dersom den eine klassen forsvinn.
– Ingenting me heller vil
Fylkesordførar Jon Askeland (Sp) i Vestland stadfestar måndag ettermiddag at saka kan verta løyst som følgje av den uvanlege rekrutteringsprosessen. Han har fått positive signal frå fylkesadministrasjonen, men kan enno ikkje lova noko. Fyrst må dei personalmessige formalitetane på plass.
Det fyrste inntaket er allereie gjennomført, så ei eventuell endring kan fyrst skje i samband med det andre inntaket.
– Det er ingenting me heller vil enn å få på plass to klassar. Det er etterspurnad, seier Askeland.
Han rosar Kvam herad og næringslivet for å ha teke tak i saka, for tilbodet har etter hans syn mykje å seia for lokale verksemder.
– Generelt er det veldig viktig at næringslivet, Kvam herad og skulen spelar på lag for å utvikla tilbodet, seier Askeland, som påpeikar at samspel om utvikling av lokalsamfunn er ei hovudoppgåve for Vestland.
Askeland vart blanda inn i saka av di fylkesrådmannen er på ferie. Normalt vert klassejusteringar politisk handsama. Endringane er difor, ifølgje notatet, gjorde i samråd med fylkesordføraren.
Får halv klasse
Rektor Ingebjørg Bakke ved Kvam vidaregåande skule stadfestar at skulen ikkje fekk kvalifiserte søkjarar då TIP-stillingane vart lyste ut. Ifølgje henne er det ei utfordring over heile landet. Kanskje har betre lønsvilkår i privat næringsliv noko med saka å gjera, seier ho.
Ifølgje notatet har Kvam vidaregåande føreslege å gjera om den eine TIP-klassen til ein halv elektroklasse dersom TIP-tilbodet vert halvert, slik at elevar kunne få oppfylt andreynsket og følgja «kryssløpet» til VG2 TIP.
Skulen får uansett utvida tilbodet med ein halv klasse i studiespesialisering på VG3, av di ni elevar som var på utveksling til utlandet førre skuleår, ville ha mangla plass med berre den eine planlagde klassen.
