Opprydding er sett på vent

Enden på visa er med andre ord ikkje skriven. Pålegget frå Ullensvang kommune gjeld framleis, men det finst ingen eigar til å gjennomføra det. Ullensvang Holding er meldt oppløyst. Det kjem fram i ein orskurd frå Hordaland tingrett 20. november. Det skal vera skiftesamling etter konkurslova i midten av januar.

– Pålegget vil fylgja eigendomen til neste eigar, men korleis eit eventuelt sal går, og når det eventuelt vil skje noko fysisk i terrenget, er ikkje godt å seia, skriv Stefan Karlstrøm, sakshandsamar og rådgjevar ved byggjesaksavdelinga i Ullensvang kommune, til HF.

Ifylgje Karlstrøm vart kommunen i haust kontakta av ei interessegruppe som vurderte å kjøpa hyttefeltet. Gruppa ynskte å høyra kva alternativ som fanst for å løysa «floken» ved eit eventuelt kjøp. I tillegg til interessegruppa og representantar for kommunen var Tore Eiken i Ullensvang Holding og arkitekt Alv Martin Vangdal til stades.

Tre alternativ vart skisserte i møtet:

• Laga ny reguleringsplan eller sjå på moglegheita for å endra planen etter ein forenkla prosess.

• Søkja om dispensasjon for heile eller delar av dei utførte tiltaka.

• Tilbakeføra området til opphavleg tilstand.

Ifylgje referatet oppmoda kommunen om å sjå på området som ein heilskap og sjå på moglegheita for å retta dei ulovlege forholda gjennom reguleringsplanen. Den gjeldande planen er av eldre dato, og med ein ny reguleringsplan kan ein òg sjå på andre aspekt, som til dømes utnyttingsgrad, ifylgje kommunen.

Med ei eventuell endring etter forenkla prosess får ein ikkje retta opp i alle dei ulovlege tiltaka. Å gje dispensasjon for alle forholda er ikkje aktuelt, opplyste kommunen.

Det vart ytra eit ynske om at kommunen utarbeider ein ny reguleringsplan. Private initiativ må stå for private planar, står det i referatet.

Nyleg melde interessentane at eit kjøp ikkje lenger var aktuelt, opplyser Karlstrøm.