Oppmodar til innsats mot einsemd
Berre eitt innspel er kome til strategiplanen for integrering i Kvam.
Planframlegget har vore på høyring i seks veker, har vore presentert i eit allmøte og har vore omtala breitt i HF. Likevel kom det altså berre eitt innspel til arbeidet. Det sende Beate Gauden, tidlegare leiar for skule og barnehage i Kvam herad.
I februar kjem planen til politisk handsaming igjen. Rådmannen føreslår som fylgje av innspelet frå Gauden å ta inn eit par avsnitt om framdrift om måloppnåing. Dei andre innspela hennar vert vurderte som gode, men ikkje relevante i ein overordna plan.
Etter Gauden si meining gjev dokumentet ei tydeleg retning for integreringsarbeidet. At heradet vil ha eit meir heilskapleg integreringsarbeid, er prisverdig, meiner ho. Gauden synest at fadderordninga for familiar i saker som gjeld barnehage og skule, er svært positiv.
Innvandrarar saknar gjerne sosiale hopehav. Desse er naudsynte for språklæring, skriv ho. Døme på korleis desse behova kan stettast, er «naboskap i velkomstgåve» og møtestader som er opne i alle feriar og høgtider når det er ekstra mykje einsemd, både i Øystese og Norheimsund.
Døme på møtestader for vaksne er turgrupper og frivillige organisasjonar. For nye innvandrarmødrer kan ein skipa til trilleturar etter dei obligatoriske barselgruppene på helsestasjonen, føreslår Gauden.
Fleire ungdomar vert sitjande åleine på fritida. For å bøta på dette, bør det opprettast fleire uformelle sosiale møtestader for born og ungdom, også i feriar og høgtider, påpeikar Gauden. Planen bør visa til korleis ein tenkjer seg at dei språklege ferdigheitene til fleirkulturelle skal utviklast, meiner ho.
Kompetanseheving er eit leiaransvar og ikkje noko som «kjem» til avdelingane, meiner Gauden. Kvar arbeidstakar har ansvar for å involvera andre tenester og arbeida tverrfagleg, skriv ho.
Strategiplanen vert drøfta av formannskapet 10. februar og vedteken av heradsstyret 15. februar.
