Opphevar lokale tiltak
Kvam herad opphevar den lokale forskrifta med strengare tiltak, men ikkje alle elevane får koma på skulen måndag.
Det vil seia at berre dei nasjonale retningslinene vil gjelda frå midnatt, opplyser heradet i ei pressemelding sundag kveld.
Kriseleiinga hadde møte i kveld for å drøfta den lokale situasjonen. Gruppa meiner at ein har oversikt over det lokale utbrotet.
Artikkelen held fram under annonsen.
Skular, barnehagar, kulturskule og vaksenopplæring går attende til gult nivå.
På grunn av omlegginga kan ikkje alle skulane opna for elevane med ein gong. Elevane på Øystese og Norheimsund skule og Kvam ungdomsskule skal ha digital undervising måndag. Tysdag skal alle elevane møta på skulen.
Barnehagane er på raudt nivå med avgrensa opningstid måndag, men er tilbake på gult nivå tysdag.
Treningssenter, symjehallar og museum kan opna for publikum under dei nasjonale reglane. Det same gjeld arrangement og aktivitetar.
