Oppgang i besøk, men dårleg likviditet

I april – påskemånaden i år – løyste 3.716 billett til badeanlegget i Øystese. Det var monaleg fleire enn i fjor, men den gongen var anlegget stengt halve månaden.

I tillegg var det stengt ei veke i slutten av mars, noko som speglar seg ein oppgang på 1.008 til 4.398 selde billettar. I 1. kvartal løyste 10.306 personar billett, ein auke på 1.588 frå i fjor.

Totalt i fjor selde anlegget 39.036 billettar. Etter fire månader av 2021 var talet 14.022, syner statistikken som er send til Kvammabadet KF og Kvam herad. Ifylgje dagleg leiar Anita Storemark er det budsjettert med 52.454 billettar i år. Eit budsjett i balanse krev 61.500, opplyser ho.

Korleis billettane fordeler seg mellom enkeltbillettar og ulike former for «medlemskort», seier statistikken ikkje noko om. Frå og med neste rapportering må selskapet rapportera også desse tala, ettersom heradsstyret krev det i eit vedtak gjort 24. mai. I tillegg må Hardangerbadet framleis levera periodisert rekneskap annankvar månad.

Likviditetsprognosen som er levert saman med statistikken, syner at selskapet vil få svekt likviditet dei neste månadene og ein likviditet på berre 42.346 kroner i juni og juli. Prognosen er basert på faktiske tal frå dei fire fyrste månadene og estimat for resten av året.

Heradsstyret vedtok 24. mai å gå med på å betala ut halvparten av det kommunale tilskotet til underskotsdekning for 2021 på to millionar kroner straks. Med i prognosen er investeringar i ein plantevegg og ei maskin til å vaska vindaugo på til saman 70.000 kroner.