Oppdrettarar ankar trafikklys-dom
25 oppdrettarar på Vestlandet ankar ein dom frå tingretten om «trafikklyssystemet» mot lakselus.
Det skriv NRK.
Staten meiner oppdrettarane er i raud sone og difor må kutte i produksjonen.
Annonse
– Vi meiner saka er av ein prinsipiell art som gjer at den må vidare i rettssystemet, seier talsperson Even Søfteland for oppdrettarane til NRK.
Trafikklyssystemet kom på plass som følgje av at staten ønskte å få kontroll på luseproblemet i oppdrettsnæringa. Områda med mest lus fekk raudt lys, og måtte dermed redusere produksjonen.
Striden mellom dei 25 oppdrettarane og staten står om kor vidt området frå Nordhordland til Stad burde vere raudt, eller ikkje.
– Vi er usamde i det faglege grunnlaget for at oppdrettarane i dette området fekk raudt lys i 2019. Vi går til sak for å få erkjent dette ugyldig, sa Søfteland til NRK då dei gjekk til sak.
