Opning av treningssenter har ikkje gitt auka smittefare
Forskarar frå Universiteta i Oslo og Tromsø har forska på om det faktisk er auka fare for å bli smitta av korona på treningssenter. Forskinga viser at opning av treningssenter ikkje har gitt auka smittefare.
– Ingen blei smitta. Så lenge folk følgjer smittevernråda om hygiene og avstand, er det ikkje auka fare for spreiing av viruset på treningssenter, seier Ørjan Olsvik. Han er ein av forskarane bak studien og professor i medisinsk mikrobiologi ved UiT
Forskarane delte medlemmene på fem treningssenter i Oslo inn i to grupper, kvar gruppe på om lag 1850 personar. Den eine gruppa fekk trene på senteret, den andre fekk ikkje, skriv UiT på sine nettsider.
Av heile testgruppa vart det registrert at ein person hadde blitt smitta av Covid-19. Personen hadde ikkje trent på treningssenter.
Michael Bretthauer, forskar ved UiO, seier studien er mogleg å generalisere med atterhald:
– Det kan vere plassar der det er mykje Covid-19, eller der folk ikkje følgjer smittevernråda i tilstrekkeleg grad. Då vil ikkje studien kunne generaliserast.
