Opnar nytt treningssenter

– Me har gått med draumen i lang tid, og han har vorte sterkare og sterkare. Me fann ut at livet er for kort til å ikkje gjera alvor av det, seier Berge.

Planane har vorte til litt etter litt, og dei to har vore på utkikk etter lokale. Då Villa Decor og Blomastovo kunngjorde at dei skal stenga, og eit stort lokale i sentrum dermed vart tilgjengeleg, passa det heilt perfekt.

– Det ligg i sentrum, er synleg, og folk går forbi der. Me har tenkt å ikkje berre vera ein treningsplass, men også ein møteplass. Dei dagane ein ikkje orkar å trena, kan ein komma og ta ein kaffikopp, seier Berge.

Eigen baby

Neteland driv og eig Ugler i Mosen AS. Ho har trent i mange år, både med og utan Berge, og ho ser fram til å ta hobbyen til eit nytt nivå.

Berge er utdanna personleg trenar og kosthaldsrettleiar, med over ti års erfaring. I tillegg til å vera deltidsbrannkonstabel og jobba hjå Mo Sport AS, har ho vore tilsett i Hardanger Trening AS, som ho altså no tek opp konkurransen mot.

– Det handlar litt om å ha sin eigen baby. Du kan jobba gratis heile døgnet med noko som er ditt eige, seier ho.

– Kva skal skilja Attrå frå konkurrenten?

– At me er til stades og anten drikk kaffi eller trener, seier Berge.

– Det skal vera ein møteplass. Går du gjennom Grova, skal det vera vanskeleg å gå forbi, seier Neteland.

– Er det marknad for nok eit treningssenter i Norheimsund?

– Me håpar det. Me håpar at fleire skal byrja å trena. Me ser at marknaden for ting og gjenstandar er litt metta, og folk brukar meir pengar på helse og velvære. Det ser ut til å vera ein veksande trend, seier Berge.

Ikkje berre seksuelt

Attrå er eit gammalt norsk ord som tyder sterk lyst eller lidenskap.

– Me har lyst til å ta vare på det gamle i språket vårt, og gjera folk litt nysgjerrige. Og så er det kult at det også kan ha ei seksuell lading, seier Berge.

Ho har vore i kontakt med Språkrådet og lokale dalingar for å forsikra seg om at det også kan brukast platonisk.

Berge seier at det er kjekt å få andre til å sjå gleda ved trening, og kva det gjer med både kropp og psyke.

– Mange byrjar å trena for å gå ned i vekt eller for å bli sterkare. Har du fokus berre på å oppnå eit resultat eller for å kunna eta det ekstra kakestykket, er det slitsamt. Men etter kvart byrjar ein sjå alle dei andre fordelane. Då vert det så mykje lettare å komma seg på trening. Det er kjekt når ein ser at folk får det til, får resultat, og byrjar å lika å trena, seier Berge.

Blod, sveitte og tårer

Berge og Neteland overtek lokalet 10. august. Dei to er førebudde på skjer i sjøen, men målet er å opna dørene 1. september.

Dei har planar for treningssalar inst i lokalet og garderobar og multisal i andre etasje.

I byrjinga vert det berre eigentrening, men etter kvart skal dei starta med både spinning- og rotimar. På lang sikt, viss kreftene og pengane strekker til, vil dei ha inn «crossfit»-utstyr som eit supplement.

– Vegen må verta til medan me går. Me er avhengige av medlemer for å bygga oss. Men viljen, ambisjonane og lysta har me, seier Neteland.

Båe to har andre jobbar, og Berge understrekar at dei ikkje ser føre seg å kunna leva av treningssenteret åleine.

– Det vert ein veldig tidkrevjande og kanskje ein veldig dyr hobby. Uansett vert det blod, sveitte og tårer, nett som me likar det.