Opnar ikkje for utviding av hotell

– Planen kan koma i strid med nasjonale eller viktige regionale omsyn, skriv han i eit innspel til oppstarten av reguleringsarbeidet.

Føremålet med planen er både å regulera hotellet Hardanger House, som vart reist på dispensasjon frå Jondal kommune, og å reisa eit nytt bygg som skal knytast til hotellet med ei gangbru.

Les også:

Kritisk til utviding

Bygget skal innehalda fleire hotellrom og andre hotellfunksjonar som restaurant, kontor og kulturlokale. I tillegg kjem ei tilhøyrande bryggje, turstiar ved Akkjerhaugen og eit badeområde ved det enno ikkje godkjende badehuset framom hotellet. Planen er å riva den gamle verkstaden som ligg ved sjøen.

Området vart forsøkt regulert for nokre år sidan, men planarbeidet stoppa opp som følgje av motsegn frå Statsforvaltaren. Sidan har tiltakshavaren og hotelleigaren innsett at hotellet, som i dag har ni rom, treng utviding. Dessutan er kaiarealet utvida. Planane om eit isbreliknande kultursenter er skrinlagde. Difor er planarbeidet varsla på ny i vår.

Statsforvaltaren viser til tidlegare innvendingar han har hatt til hotell i denne delen av området, og føreset at denne funksjonen vert teken ut av planen. Han viser til at bygget råkar friareal i kommuneplanen og ligg i byggjeforbodssona langs sjøen.

Tiltakshavaren har konkludert med at tiltaket ikkje utløyser plikt til å skriva ei konsekvensutgreiing. Statsforvaltaren meiner at vurderinga er «særs skissemessig» og ikkje tilstrekkeleg når det gjeld strandsoneverdiane.

–Me vil ikkje motsetja oss at eksisterande hotell vert regulert i plan. Men ein må ikkje opne for annan arealbruk som kjem i konflikt med særskilde verdiar for friluftsliv og allmenn ferdsel, naturkvalitetar, naturmangfald, kulturminne, kulturmiljø og landskap, heiter det i fråsegna.

Om ikkje dei nemnde momenta vert lagde til grunn for planarbeidet, varslar Statsforvaltaren ei mogeleg motsegn.

Oppteken av kulturmiljø

Også fylkeskommunen har sendt fråsegn. I tillegg til å servera generelle merknader om arkitektur og klima spør fylkeskommunen kva følgjer utvidinga vil få for det heilskaplege kulturmiljøet i området, «eit av dei mest karakteristiske og synlege områda anten ein kjem med bil eller båt til Jondal. Konsekvensane kjem ikkje klart fram av dokumenta, ifølgje innspelet.

Fylkeskommunen minner om at planområdet ligg rett nord for Kattanes, eit kulturmiljø regulert til bustadområde for bevaring. Føremålet er å ta vare på mest mogeleg av den eldre bygningsmassen i Jondal. Rådet er difor å planleggja føringar for mellom anna volum, skala, materialbruk og terrengtilpassing når nye bygg skal reisast ved Akkjerhaugen.

På sjølve haugen ligg ein gravhaug som er automatisk freda. Hauen er skadd av ein bautastein og moderne tilrettelegging, men er likevel markant og ligg sentralt plassert. Verknadene av utbygginga for haugen må vurderast, heiter det.

Fylkeskommunen forventar elles ei utrekning av trafikkmengda dei nye tiltaka vil føra med seg, og at det vert vurdert om avkøyrsla frå fylkesveg 550 er rett dimensjonert. Tiltaka vil føra til stor trong for parkeringsareal, og fylkeskommunen rår frå å visa til parkering i offentlege område eller i sentrum.

Tiltakshavar er Acos Invest AS. Ard arealplan AS utfører planarbeidet i samarbeid med Arkitekt Rolv Eide AS. Planområdet er 20,4 mål stort.