Opnar forsiktig etter skredet

Det opplyser geolog i Vestland fylkeskommune, Håvard Fremgaard Fiksen, torsdag ettermiddag.

– Det står framleis att noko arbeid, men dette vil verta gjort neste veke. Då vil vegen verta stengd i periodar, skriv Fiksen i ein sms.

Informasjon om når det vert stengt, kjem truleg fredag, legg han til.

Meteorologisk institutt har varsla nær 60 millimeter nedbør på Kjepso fredag, og har sendt ut fleire farevarsel. Fylkesveg 79 er generelt utsett for skred, så med tanke på nedbørsmengdene som er melde, bør ein kanskje utsetja turen med mindre det er høgst naudsynt, meiner geologen.

Torsdag ettermiddag varsla Vegtrafikksentralen vest at vegen vert stengd til fredag klokka 17. Då vert opning vurdert.

Les meir om det varsla vêret nedst i saka.

– Borte bra, men

Bebuarane i huset nedom skredet er framleis evakuerte. Det skriv Heidi U. A. Schelin i ein sms til HF. Huset vart treft av ein stein, som gjorde skade på den eine husveggen.

– Me ventar spent på neste oppdatering, der me håpar på å få vita om og eventuelt når me får flytta heim att, skriv Schelin.

Ifylgje henne har familien det bra trass den skumle opplevinga. Og sjølv om borte er bra, er heime best, slår ho fast.

– Alvorleg situasjon

Ordførar i Kvam herad, Torgeir Næss (Ap), er oppgjeven og forbanna. Det kom tydeleg fram i eit innlegg han skreiv på Facebook måndag.

– Det vert våtare. Ekstremnedbøren aukar. Vekslinga mellom frost og mildvêr om vinteren vert hyppigare. Sjølvsagt rasar det meir på Vestlandet og andre stader i landet der det er bratt og nedbørsrikt. Dette er varsla. Ingen av dei styrande dei siste ti åra er klimafornektarar. Kvifor i svarte vert det då ikkje satsa meir på klimatilpassing; på rassikring og utbetring av fylkesveg i Noreg? skriv han.

Til NRK Vestland seier Næss at regjeringa – inkludert hans eige parti – sine løyvingar til skredsikring er ei skam. I fleire tiår har det vorte spela inn på alt frå lokallagsmøte til landsmøte. Det trengst eit paradigmeskifte i samferdselspolitikken, meiner han.

Flaks

Direktør Hroar Holm Carlsen ved Elkem Bjølvefossen understrekar kor viktig det er at ein kjem i gang med meir skredsikring på Vestlandet. Dei tilsette ved Elkem Bjølvefossen fekk skredet måndag nært innpå seg. Mellom fem og ti personar tilsette pendlar til og frå jobb innover fjorden. Ein av dei kom mildt sagt midt oppi det, men slapp unna med skrekken.

No er ordførar Næss lei.

– Me treng ein sosialdemokratisk samferdselspolitikk som kan utjamna skilnader og prioritera dei med den dårlegaste standarden fyrst. Det er sjølvsagt i økonomisk politikk, og det må vera sjølvsagt i samferdselspolitikken, sa han til NRK.

Gult, oransje og raudt

Meteorologisk institutt har vurdert flaumfaren og nedbøren i Kvam til gult nivå fredag. Det vil seia at det er fare for overvatn, lokale overfløymingar, bekke- og elveløpsendringar og jord- og flaumskred der vatnet ikkje får renna uhindra som fylgje av til dømes snø og is.

Jord-, sørpe- og flaumskredfaren er sett til oransje nivå. Med det seier ein at det er venta fleire skredhendingar, og at nokre kan få store konsekvensar. Framkoma kan verta redusert. Bratte skråningar, bekkar og elveløp med stor vassføring er spesielt utsette.

Det raude farevarselet gjeld snøskredfare og er på nivå fire av fem. Ferdsel i skredterreng er frårådd. Ein bør òg unngå utløpsområde, då store, naturleg utløyste skred er venta.