Opnar for småbåthamn

Rådmannen rådde frå å ta med hamna då den såkalla premissavklaringa vart drøfta av planutvalet 26. september. Dei folkevalde la vekt på kor viktig prosjektet er for å realisera planane om både bustader, fritidsbustader og næringslokale.

– Eit flott prosjekt som gjev utvikling på Omastrand. Det er vesentleg å få hamna med, sa Gry M. Kyrkjeeide (Frp).

Ho, og fleire med henne, framheva at utbyggjaren vil gje folk flest, ikkje berre kjøparane av bustader og hytter, tilgang til hamna. Tiltaket vil medverka til å realisera målet om å skapa ein oppsiktsvekkjande kommune, meiner Siv Håbrekke (Sp).

Svein Johannes Stuve (Sp) meiner at om ein skal lokka tyskarar til seg, må ein tilby tilgang til sjøen og til fiske. Hamna må til for å realisera prosjektet, sa han.

Ikkje i plan

Det viktigaste argumentet for at rådmannen ville utelata hamna, er at det ikkje er sett av areal til henne i kommuneplanen frå 2019. Der er det aktuelle arealet sett av til landbruks-, natur og friluftsområde på land og ålment fleirbruksareal i sjøen.

Hans Arne Børsheim (KrF) meiner ei hamn for ålmenta må seiast å vera i tråd med føremål, sjølv om det kanskje ikkje per juridisk definisjon er slik. Han ser inga motsetning mellom prosjektet på Omastrand og sentrumsområdet og hamna på Tangerås.

– Det vart mykje styr på Tangerås, og snakk om at området vart øydelagt og privatisert. Det er det motsette som har skjedd. Det har aldri vore så mykje folk der som no, sa Børsheim.

Han, og fleire med han, ottast at Statsforvaltaren vil protestera når reguleringsplanen kjem på høyring. Likevel ser han ikkje lyst på alternativet – ei «kvilelaus ørkenvandring» for å rullera kommuneplanen.

– Korleis kan me nytta sjøen i kommunen vår? spør eg meg, sa Børsheim.

Peika på historia

Even Øyri (Ap) minte om at det låg ei hamn på Omastrand i framlegget til den gjeldande kommuneplanen, men at området skal ha vorte «forhandla vekk» i innspurten av di ein fekk til hamna på Tangerås. Resultatet er at det ikkje finst hamneareal sør for Strandebarm. Saka må sjåast i lys av den forhistoria, meiner han.

Øyri meiner det er betre å samla båtane i hamner i staden for å ha naust på kvart nes. Slik vert presset på strandsona mindre, meiner han. Han trur ikkje det vil vera nok å tilby hyttetomter på Omastrand utan tilgang til sjøen.

– Men det blir sikkert ein lang veg å gå med Statsforvaltaren, sa han.

– Den kampen skal og må ein ta. Ved å vera klok i samtalane med han vil også Statsforvaltaren sjå at dette er mogeleg å få til. Det handlar om Oma sin eksistens, sa Randa, som ikkje ser bort frå at nokre av hyttekjøparane etter kvart kan koma til å busetja seg fast.

Også SV stilte seg altså bak hamneplanane. Geir Madsen (SV) viste til at området ved sjøen er veldig bratt og truleg lite i bruk.

Eigaren fekk ros

Tufta, som var til stades som tilhøyrar, fekk elles ros for å tenkja stort og nytt og for å satsa og vera modig. Han har slege seg saman med Voss Byggsenter AS for å realisera prosjektet. Neste steg er å laga reguleringsplanen.

– Den tredelte kindereggløysinga er det som skal til for å lukkast, sa Ottar Randa (H) om blandinga av hamn, hytter og hus.

Han ser ikkje bort frå at Kvam herad kan kjøpa seg inn i prosjektet for å hjelpa til med å realisera det. Før sommaren sette heradsstyret av 50 millionar kroner til slik draghjelp.