Opnar for leiar på ny stad
Det er ikkje garantert at Hardangerrådet skal halda fram med kontorstad i Kinsarvik.
Hardangerrådet har hyra Headvisor AS til å leita etter ny dagleg leiar til Hardangerrådet AS. Avtalen vart godkjend av regionrådet i møtet i Kinsarvik 21. juni. Stillinga er lyst ut i sommar.
Kontorstaden skal vera i Hardanger, ifylgje vedtaket. Det er med andre ord ikkje openbert at det framleis skal liggja i Kinsarvik, men i lysinga står det at kontoret ligg i «Kinsarvik/Hardanger».
Ordførar Torgeir Næss (Ap) i Kvam herad oppklarar: Kinsarvik er utgangspunktet, men dersom det dukkar opp kandidatar som vil arbeida andre stader og set det som vilkår for å ta jobben, må det vera greitt, meiner han.
Ifylgje møtereferatet skal den nye leiaren mellom anna setja Hardanger på kartet i inn- og utland, auka aktivitetsnivået, ha ambisjonar, vera utviklingsorientert, vera sosial og gjerne ha røynsle frå politikk eller offentleg administrasjon.
Vedkmande vil få høve til å påverka korleis rådet bør vera organisert og kor mange tilsette administrasjonen bør ha. Etter at Jostein Eitrheim gjekk av som dagleg leiar i vinter, har berre konsulent Trude Rinaldo vore tilsett.
