Opnar avdeling i Jondal
Røyrleggjarfirmaet Brekke og Lie VVS AS får ei ny avdeling i Jondal etter nyttår.
Dagleg leiar John Asle Lie fortel at verksemda får ein ny tilsett på nyåret. Han bur i Jondal og ville gjerne ha kort veg til arbeidsplassen. Difor bestemde bedrifta seg for å etablera ei eiga jondalsavdeling.
No har verksemda leigt eit lite lagerlokale i Nedre Sætveithagen. Startskotet for den nye avdelinga går 2. januar.
– Me har hatt ein del oppdrag på den sida av fjorden, så det passa bra, fortel Lie.
Han starta firmaet i 2018 saman med Harald Brekke. Sidan har dei hatt base i Norheimsund og teke oppdrag i mellom anna Samnanger, Ullensvang, Kvinnherad og Bergen. I dag består firmaet av tre tilsette og to lærlingar.
– Det viktigaste er ikkje å vera mange, men å gjera godt arbeid, seier Lie.
Omsetninga har auka år for år, frå 4,8 millionar kroner i startåret til 12,2 millionar kroner i 2022. Verksemda har hatt overskot kvart år. Brekke og Lie eig 50 prosent av aksjane kvar.
