Opna på tampen av sesongen
Mødalstrekket tok nyleg imot dei første gjestene i vinter. Årsaka til den seine opninga var manglande godkjenning.
Statens jernbanetilsyn (SJT) har ansvaret for å føra tilsyn med skitrekk. I fjor vår gjennomførte tilsynet eit såkalla dokumenttilsyn for å finna ut korleis verksemda inspiserer komponentar som er særleg utsette for å verta overbelasta.
Drifta av Mødalstrekket står Norheimsund Skiheis AS for. Terje Mathiassen er driftsleiar. Han fortel at verksemda jamleg visuelt sjekkar trekket for sprekkar og andre teikn til slitasjeskadar.
– Det var ikkje godt nok for tilsynet, som meiner at fleire av dei mest utsette delane burde gjennom såkalla NDT-kontrollar. Dette er eit knippe metodar som mellom anna vert brukte for å finna slitasjefeil, seier Mathiassen.
Klemmer skapar problem
Norheimsund Skiheis har brukt vinteren på å få profesjonelle til å gjennomføra dei naudsynte testane. Dei aller fleste delane vart godkjende. Unntaket var dei såkalla «medbringar-klemmene», altså klemmene som festar det brukarane sit på til vaieren som dreg trekket.
– Testane synte det som kan vera sprekkar i klemmene. Me har likevel fått dispensasjon for å driva trekket til 1. mai. No arbeider me med å få levert resultata av testane. Me håpar byråkratiet arbeider raskt nok til at me kan opna til påsken, sa han til HF nyleg – og opning før påske vart det altså.
Sjølv om testane kan tyda på sprekkar i klemmene, trur ikkje Mathiassen at det er naudsynt å skifta dei. Klemmene i anlegget er heimelaga og ikkje så glatte som industriproduserte klemmer.
– Truleg er det årsaka til at testane synte sprekketendensar. Eg trur klemmene er svært robuste. Me jobbar med å finna testmetodar som kan bevisa dette. Klarar me ikkje det, må me truleg kjøpa nye klemmer til neste sesong, seier han.
Tre magre år
Trekket opna altså nyleg, og heldt ope laurdag. Det vert ope i heile påsken. Sjølv med ein god påske trur Mathiassen at anlegget kjem til å gå med underskot denne sesongen. Sesongen vert den tredje dårlege på rad. Den førre vart spolert av lite snø. Året før det var det koronaviruset som gjorde at trekket knapt var ope.
– Me driv anlegget på dugnad på fritida vår. Dei åra me har hatt overskot, har pengane gått rett inn i verksemda. Me gjer ikkje dette for å verta rike, men me treng nok inntekter til å få dekt utgiftene våre, seier Mathiassen.
Mødalstrekket vart bygd tidleg på 1960-talet og hadde det første driftsåret i 1964. Dei noverande eigarane har drive anlegget sidan 2014.
