Opna nybygg i Øystese
Det var truleg nokre velfortente kakestykke som vart delte ut i Øysteseparken torsdag føremiddag.
Ein dugnadsgjeng på nær tjue personar har i alle fall teke i nokre tak for å få tak over hovudet i parken. Under opninga fekk dei nyta av både søtt, skryt og noko varmt i koppen.
Som seg hør og bør vart det både klipt snor og sagt nokre velvalde ord. Nær 30 personar møtte opp.
Tenkt til sansehage
Fyrst ut var Jon Teigland. Han er med i styret i Øystese Grendautval, og har vore ein slags prosjektleiar for oppføringa av skytja. For å få med heile historia til prosjektet, lyt det takast med at Teigland er med i Lions Club Norheimsund.
Lions-klubben fekk nemleg for over ti år sidan laga den omtalte skytja. Sjur Sandven og Torfinn Haugstad stod bak arbeidet, og planen var å nytta bygget i ein sansehage som var planlagd utanfor Toloheimen. Sansehagen er enno ikkje på plass.
GBS Entreprenør AS har lagra skytja, og ynskte å rydda opp. Då spurde Øystese Grendautval om å få kjøpa bygget. Fyrst var det tenkt som eit innslag i parken ved Hardangerbadet, men arkitektane bak parken var ikkje samde, sa Teigland.
Det vart såleis bestemt å søkja om plassering i parken nær den kommunale kaien, og det vart godkjent. Kvam herad har vist velvilje heile vegen, fortalde han.
500 timar
Troskytja måler om lag tre gongar fem meter. Sjølve arbeidet tok til i midten av mai. Olav Tjosås (90) har køyrt gravemaskin og teke seg av grunnarbeidet. Ingmar Ølmheim og Per Soldal har stilt med traktorar. Sistnemnde, på over 80 år, har vore byggjeleiar, opplyste Teigland.
– Han kan dette her, la han til.
Etter vel 500 timar med dugnad – inkludert mykje sosialt samvær, påpeika Teigland – er det meste ferdig. Det som står att, er mellom anna å pynta litt rundt skytja, og å flytta bordtennisbordet litt nærare henne. Truleg vert også borda i skytja bytte ut med nokre litt meir solide variantar.
Totalt har prosjektet kosta nær 70.000 kroner. Tilskot frå heradet og Sparebankstiftinga Hardanger har kome godt med, sa prosjektleiaren.
– Godt folkehelsetiltak
Varaordførar Frode Nygård (Frp), som fekk æra av å opna bygget, nytta høvet til å takka dugnadsgjengen i Øystese for innsatsen dei legg ned. Han sa at heradet set stor pris på arbeidet.
– Arbeidet vitnar om stor omsut for at både innbyggjarar og tilreisande skal oppleva eit nærmiljø med høge kvalitetar, sa varaordføraren.
Skytja i all si prakt er eit syn for auga, og å ta vare på og syna fram gamal handverkstradisjon er viktig, meiner Nygård.
– Eg håpar timane de legg ned, gjev dykk noko tilbake. Å pleia godt kameratskap, slå av ein prat og nyta ein kopp kaffi saman er også eit godt folkehelsetiltak, sa han.
I ein avtale med Kvam herad om bruken av det kommunale arealet står det at Øystese Grendautval har driftsansvar for bygget. Det inneber mellom anna naudsynt rydding, stell og vedlikehald. Troskytja skal vera forsvarleg halden ved like og sikker i bruk, heiter det i avtalen.
