Opna med leik og moro for alle

— Det har vore eit jamt sig av folk.

Det seier leiar i Grannehjelpa, Gunn Hilde Øymo, når HF vitjar aktivitetsdagen føremiddag. Trass regn, vind og fotballcup i Ålvik hadde ein del teke turen til parken ved Hardangerbadet.

Spesielt familiehinderløypa, som Øymo kalla det, var populær hjå borna. Her kunne ein mellom anna sjå kor lågt ein kom i danseleiken limbo, prøva å kasta erteposar i boksar og hoppa tau. Fotballøypa var for augneblinken den mest populære posten. Fleire stod i kø for å dribla seg forbi kjegler og skyta så hardt dei kunne i mål. Plutseleg hamna ballen på sjøen. Ballberging vart prøvd, men rømlingen sette kursen mot Herand.

Om aktivitetsnivået vart vel høgt, venta ein spanande natursti langs fjøra. På fyrste posten måtte ein vita kva som var Noregs høgaste fjell, i tillegg til kva hovudstaden på Færøyane heiter. Dei som gjekk heile løypa og leverte inn skjema med svar, kunne bli trekte ut som vinnar og få premie. Under tak venta enkel servering, med kaffi, te, saft og wraps som var bestilte inn for anledninga.

— Her er det mykje for kvar ein smak, fortel Øymo.

Spanande sjøliv

Bortanfor stranda heldt marinbiolog Pia Ve Dahlen på, til stor begeistring for både store og små. Ho hadde tidlegare på dagen snorkla og henta opp fine eksemplar frå det mangfaldige sjølivet. Dei som var til stades, kunne få sjå og halda i kråkebollar, sjøstjerner og krabbar. I tillegg kunne ein prøva lukka i krabbefisket.

Hinderløypa var det elevar ved Framnes Kristne vidaregåande Skule som hadde planlagt og laga til. Ein av dei frivillige som var med, var Alma Tveita. Ho kjem eigentleg frå Røldal, og går andre året på skulen i Vikøy. Ho synest det berre er kjekt å kunne bidra, og fortel at det ligg naturleg for henne å vera med på slike viktige dugnader.

— Eg er veldig glad i born, så det er veldig kjekt å vera med og arrangera slike ting. Du ser jo kor glad dei borna som er med, blir, seier ho.

Sjølv om dei fleste av borna som har vore på aktivitetsdagen, kjem med foreldre, fortel Øymo at det også har kome born aleine. Ho er godt nøgd med opninga av «veko».

— Ei opning med fullt fokus på familie, og som er open for alle. Eg synest det er fint, seier ho.

Ingen ville tevla

Også denne gongen vart også Øystesetrimmen arrangert parallelt med aktivitetsdagen, slik at dei får ein symbiotisk effekt. Øystese Idrettslag hadde sett opp telt til påmelding og registrering ved sidan av aktivitetane. Om lag 30 gjekk trimløypa, men konkurranseklassen var det verre med.

— Eg håpar nokon dukkar opp snart, seier arrangør Eirik Kvarv med 50 minutt igjen til start.

Torhild Kveberg dukka etter kvart opp, men konkurransen vart likevel avlyst. Kvarv påpeikar at det dårlege frammøtet kunne ha samanheng med at mange var på fotballcup med borna sine, og meiner at ein truleg ikkje kan skulda på vêret åleine.

— Sist gong det var trim i slikt vêr, deltok over 100 i trimklassen og 10—15 i konkurranseklassen, seier Kvarv.