Opna året godt, men sola kom

I det fyrste året – 2020 – var anlegget koronastengt i fleire månader, men likevel var 49.593 gjester innom anlegget. Nærast liknande tal var ein i fjor, då 47.622 vart registrerte.

Les også:

2024 opna godt for Hardangerbadet, med 2.844 fleire gjester i 1. kvartal enn i same periode i fjor. Dei tre neste månadene gjekk det tråare, og gjestetalet vart 2.653 lågare enn i april–juni i fjor. Totalt hadde 22.219 vore innom halvvegs i året, mot 22.028 i fyrste halvår i fjor. Det ligg med andre ord an til eit besøkstal om lag som i fjor om ikkje noko dramatisk skjer resten av året.

13.628 av gjestene så langt i 2024 har løyst enkeltbillett. Resten, om lag ein tredel, er medlemer. Også 1.451 gjester ved Hardangerfjord Hotel, som får «gratis» inngang til badet, er inkludert i enkeltbillettstatistikken.

Særleg i mai, då sola skein og temperaturane var høge i vekevis, prioriterte få bading innandørs. 1.893 færre var innom enn i mai i fjor. Juni vart derimot ein noko betre månad i år enn i fjor.

Ved utgangen av juni hadde badeanlegget 747 medlemer, 16 færre enn ved starten av månaden. Ikkje sidan august i fjor har færre vore medlem.

Då Kvam herad gjekk inn i prosjektet i 2017, var det stipulert eit ordinært årleg besøkstal på 61.500 i tillegg til dei besøka 750 årskort utgjer.