Open for bygg, men ikkje for båt
Rådmannen er positiv til å byggja både bustader og feriebustader på Omastrand, men vil ikkje opna for småbåthamn. Hamna er ein nøkkelfaktor i prosjektet, meiner utbyggjarane.
Det er grunneigar Ole Harald Tufta som saman med Voss Byggsenter AS planlegg å byggja både hytter, hus og næringsbygg vest for Gjerdaneset. Arealet er sett av til bustadføremål, men rådmannen er positiv til å opna opp for samlokalisering av bustader, fritidsbustad og næring med utleigeeiningar.
Planen inneheld også ein veg ned til ein marina med plass til 48 båtplassar og sørvisbygg ved Saltvika. Området er landbruksareal og allment sjøareal i kommuneplanen.
– Eg er sikker på at om me får til båtanlegget, er det veldig liv laga, sa Tufta då prosjektet vart presentert for planutvalet i vår.
Rådmannen meiner ei hamn vil auka attraktiviteten til prosjektet og supplera servicetilbodet på Oma. Det ser likevel mørkt ut. Båthamna er ikkje med i kommuneplanen, og rådmannen tilrår ikkje oppstart av reguleringsplan. Utfordringa er mellom anna dei irreversible inngrepa ho medfører i strandsona, skriv administrasjonen i utgreiinga.
Rådmannen meiner ei avklaring av behov for og lokalisering av småbåthamna må gjerast gjennom rullering av kommuneplanen.
Saka vert avgjord gjennom ei såkalla premissavklaring i møtet i planutvalet tysdag 26. september.
Les også:
