– Omfattande rolle
Bør gruppeleiarane få meir i godtgjersle enn andre heradsstyrelemer?
Det spørsmålet er reist i arbeidsgruppa som vurderer den politiske organiseringa i Kvam.
– Gruppeleiarane gjer ein stor jobb. Me har ei stor gruppe som tek hand om saker, men det finst enkeltrepresentantar som tek alle sakene åleine. Det er ein stor jobb å setja seg inn i alle sakene, sa Jostein Ljones (Sp) då gruppa drøfta saka 6. oktober.
Ordførar Torgeir Næss (Ap) er samd. Han meiner gruppeleiarrolla er omfattande og forpliktande. Gruppeleiaren skal styra, fordela og helst setja seg inn i saker, og arbeida med andre gruppeleiarar. Han viste til at det ikkje er uvanleg med ei eiga godtgjersle i andre kommunar.
– Politikk skal kosta. Me er ikkje her for pengar, men kompleksitet, ansvar og tidsbruk skal kompenserast, sa Ottar Randa (H).
Gruppa har ikkje konkludert. Medlemene skal drøfta temaet i partia før eit siste møte. Eventuelle auka godtgjersler må heradsstyret vedta som del av budsjettet.
