Oljesøl kan framleis førekoma

Det ligg lenser i vatnet for å fanga opp olja, men noko flyt utanom. Laurdag kveld vart ein særs sjaber måse med pustevanskar oppdaga i sjøkanten. Årsaka til tilstanden er vanskeleg å slå fast, men han kan ha ein samanheng med oljesølet.

Ein turist fekk auga på fuglen då han gjekk mellom stranda og fartøyvernsenteret. Han tipsa HF om saka.

– Måsen låg og leid. Det er ugreitt, seier turisten.

Etterbør i vente

Då avisa var på staden, kom også Marianne Holdhus, som er resepsjonist ved Thon Hotel Sandven, bort for å sjå til måsen etter jobb. Også ho hadde fått melding om han. Andre gjester som var ute i kajakk, hadde snudd då dei såg olja på vassoverflata i området.

Varabrannsjef i Kvam herad, Svein Valland Laupsa, fortel at sjølve oljelekkasjen er stoppa. Utfordringa er at det ligg att oljerestar i røyrsystemet. Når det regnar, vil vatnet frakta olja ut i sjøen. Ifølgje Laupsa vert ein liten oljedrope veldig synleg på vassoverflata.

– Små mengder olje kan breia seg over eit stort område, fortel han.

Fylgjer med

I førre veke mottok Kvam brann og redning fleire meldingar om den synlege olja utanfor Hardanger Brygge. Då vart det lagt ut ei ny oljelense for å prøva å absorbera mest mogleg.

– Det er fare for at det kjem fleire oljerestar frå røyrsystemet ut i sjøen, seier Laupsa.

Ifølgje han må situasjonen evaluerast på nytt så snart sommarferien er over og folk er tilbake på jobb.

Fotnote: HF-utsendingen tok hand om den forkomne måsen i tråd med råd frå politifagleg hald. Red.