– Oljemysteriet er løyst
26. juni skreiv HF at Kvam brann og redning hadde pumpa opp over to tusen liter olje frå kummane utanfor Hardanger Brygge. Tysdag vart ein ny lekkasje oppdaga.
Det opplyser Svein Valland Laupsa, varabrannsjef i Kvam herad. Han seier at brannvesenet vart kontakta av bebuarar i området, som kjende sterk lukt av eit ukjent stoff. I tillegg bobla det ut noko i sjøen på same stad som tidlegare, heitte det i meldinga.
Lek framleis
Brannvesenet rykte ut for å undersøkja saka, og sette i verk tiltak for å finna ut kvar lekkasjen kom frå. Saman med tilsette i vass- og avløpsavdelinga i heradet jobba brannmannskapet seg systematisk oppover i røyrsystemet. Eit kamera vart teke i bruk, og det vart teke prøvar av lekkasjen undervegs.
– Til slutt enda me opp hjå ei lokal bedrift. Der fann me lekkasjen, seier Laupsa.
Men lekkasjen er framleis ikkje stoppa. Ifylgje Laupsa er det ei utfordrande sak. Førebels har ein klart å hindra at lekkasjen går ut frå den aktuelle eigedomen og vidare i røyrsystemet.
– Kom lekkasjen i slutten av juni frå same staden?
– Truleg, men me veit ikkje. Prøvar er sende inn, seier Laupsa.
– Ikkje med vilje
No er verksemda i gang med eigne tiltak for å stoppa lekkasjen. Det er ikkje noko som er gjort medvite, påpeikar varabrannsjefen. Det kjem frå undergrunnen, og det er uheldige omstende som har ført til lekkasjen, seier Laupsa.
Onsdag er planen å rydda opp ved Hardanger Brygge, og fjerna lensene som har lege ute. Skulle meir koma ut, lyt folk ta kontakt, seier varabrannsjefen.
– De har brukt store ressursar på dette. Kven får rekninga?
– Etter forureiningslova er det den som er ansvarleg for lekkasjen, som lyt dekkja kostnaden. I kva grad ein kan vita at det som har kome før er frå same stad, er vanskeleg å seia.
