– Nyttar det same advokatfirmaet
Kåre Jørgen Underhaug er kritisk til at Ullensvang kommune har fått juridisk rådgjeving frå Advokatfirmaet Rasmussen & Broch i saka om tomtesal.
Det kjem fram i ein e-post Underhaug sende til formannskapet i Ullensvang tysdag kveld. I e-posten legg han fram ein påstand om at advokatfirmaet har eller har hatt også Tore Eiken på klientlista.
Dette veit rådmann Ole-Jørgen Jondahl og Ullensvang kommune om, skriv Underhaug, men Jondahl avviser påstanden.
– Det har ikkje eg peiling på. Eg har heller ikkje fått dette brevet, svarar han HF onsdag.
Ullensvang kommune har rammeavtale med fleire advokatfirma, mellom andre Rasmussen & Broch. Det er grunnen til at verksemda vart kontakta. Om det skulle vera slik at også Eiken er klient hjå verksemda, burde advokatfirmaet ha gjort kommunen merksam på det, meiner rådmannen.
HF har sett dokumentasjon på at advokatfirmaet har hatt Nito Maskin DA, eigt av Tore Eiken, som klient seinast i mai i år. I den saka var Underhaug motpart.
Ifylgje Advokatforskrifta skal ikkje ein advokat eller eit advokatfirma ta på seg oppdrag som kan føra til risiko for brot på lojalitet overfor klientane, eller brot på plikta advokaten eller firmaet har til å vera uavhengig.
HF har bedt Rasmussen & Broch om å kommentera saka. Partnar Lars Kokkin Christiansen opplyser i ein e-post at firmaet ikkje kan kommentera klientforhold. Ifylgje han har oppdraget frå kommunen vore avgrensa til forhold som «innebærer at vi ikke har tatt en sak mot en eksisterende eller tidligere klient». Firmaet er ikkje kjent med forhold som tilseier inhabilitet etter kommune- eller forvaltingslova, opplyser han.
