Nytt vrimleareal på Framnes
Den vidaregåande skulen i Vikøy har fått to nye etasjar av den gamle gymsalen. Det har gjeve mellom anna nye klasserom og opphaldsrom.
Framnes Kristne Vidaregåande Skule har brukt 14 millionar kroner på utbygging av den nye fløya, seier prosjektleiar og eigedomsutviklar, Odd Inge Austevoll.
Under utviklinga av Framnes Arena vart den gamle gymnastikksalen overflødig. 15. juni i år starta arbeidet med å ribba lokala og byggja etasjeskilje for å få to etasjar. Bygget rommar no tre klasserom, åtte grupperom, musikkrom og store vrimleareal, fortel Austevoll.
– Me har fått 600 kvadratmeter ekstra areal til elevane. No har me mykje betre undervisingsfasilitetar, seier Austevoll.
Torsdag 19. desember var det opning, og elevane fekk sjå dei nyoppussa lokala.
Ifylge Austevoll bur 30 av dei 270 elevane heime. Internatelevane går ofte på romma sine i fritimar og på ettermiddagane. I den nye avdelinga har heimebuarar har fått eige kvilerom.
Lina Valland Lyngset og Inger Sofie Moldsvor, avdelingsleiar for internatet, har hatt ansvar for å bestemma fargar og utsmykking av bygget. Ifylgje Austevoll er elevane svært nøgde med dei nye lokala.
For å ta vare på den nye avdelinga, er det innført forbod mot å bruka utesko. Då slepp ein å dra inn salt og støv, seier Austevoll. Han fortel at skulen har mål om at heile skulen skal verta skofri.
